Qazaqstan dári jetkizýge arnalǵan óz qoımalaryn salady
ASTANA. KAZINFORM – Qazaqstanda tegin dári-dármek jetkizý júıesin jetildirý aıasynda Biryńǵaı dıstrıbıýtor SQ-Farmatsııa óz logıstıkalyq ınfraqurylymyn damytýdy bastady.
Densaýlyq saqtaý mınıstrliginiń málimetinshe, jańa joba jyl saıyn shamamen 1,7 mlrd teńge únemdeýge múmkindik beredi. Sondaı-aq bastama baǵa táýekelderin tómendetip, dári jetkizý turaqtylyǵyn arttyrýǵa jáne jeke qoımalardy jalǵa alýǵa táýeldilikti azaıtýǵa baǵyttalǵan.
Logıstıkalyq ortalyqtar Aqtóbe, Astana, Almaty, Shymkent, Aqtaý jáne Semeı qalalarynda salynady.
Alǵashqy nysandy 2027 jyly Aqtóbede iske qosý josparlanyp otyr.
Qazir Qazaqstanda shamamen 3,4 mln patsıent tegin dárilik zattarmen qamtamasyz etiledi.
Olardyń qatarynda qant dıabeti, arterııalyq gıpertonııa, onkologııalyq jáne orfandyq aýrýlary bar patsıentter bar.
Dári-dármekpen qamtamasyz etý tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý aıasynda júzege asyrylady.
Mınıstrlik málimetinshe, dárilik zattardy satyp alý jospary patsıentterdiń naqty qajettiligine qaraı qalyptastyrylady. Bul rette dıagnoz, taǵaıyndalǵan preparat, naqty tutyný kólemi men syrqattanýshylyq dınamıkasy eskeriledi.
Júıeniń ashyqtyǵyn arttyrý úshin tsıfrlyq baqylaý quraldary engizilip jatyr.
Qazirgi ýaqytta qoımalardyń WMS júıeleri Biryńǵaı farmatsevtıkalyq aqparattyq júıemen ıntegratsııalanǵan. Sonymen qatar jyl sońyna deıin kólik logıstıkasyn basqarýǵa arnalǵan TMS júıesin iske qosý josparlanǵan.
Bul júıe dári-dármek jetkizilimin, sonyń ishinde aýyldyq eldi mekenderge jetkizýdi naqty ýaqyt rejıminde baqylaýǵa múmkindik beredi.
Mınıstrlik óńirler arasyndaǵy preparattardy josparlaý jáne qaıta bólý tetikterin de jetildirip jatyr. Bul tapshylyq qaýpin azaıtyp, paıdalanylmaı qalǵan dáriler kólemin qysqartýǵa baǵyttalǵan.
Vedomstvonyń dereginshe, ambýlatorııalyq dári-dármekpen qamtamasyz etýge arnalǵan preparattar tizimi halyqaralyq klınıkalyq usynymdar men dáleldi medıtsına qaǵıdattaryna sáıkes turaqty túrde jańartylyp otyrady.
Sonymen qatar ambýlatorııalyq dári-dármekpen qamtamasyz etýge bólinetin qarjy kólemi 87,2 mlrd teńgeden 2026 jylǵa qaraı 337,4 mlrd teńgege deıin ulǵaıtylǵan.
Aıta keteıik, Qazaqstanda medıtsına qyzmetkerlerin saqtandyrý erejeleri ózgerýi múmkin.
