Qazaqstan dári-dármegi Aýǵanstan naryǵyna shyǵýy múmkin
ASTANA. KAZINFORM — 2025 jyly Qazaqstannyń farmatsevtıkalyq ónim eksporty 17,8 paıyzǵa ósti. Endi otandyq óndirýshiler ónim jetkizý geografııasyn keńeıtip, Aýǵanstan naryǵyna shyǵýdy kózdep otyr. Bul týraly DSM málim etti.
Mınıstrliktiń dereginshe, Qazaqstanda farmatsevtıkalyq ónim eksportynyń kólemi artyp, saladaǵy ınvestıtsııalyq yntymaqtastyq keńeıip keledi. Otandyq farmatsevtıkalyq ónimderdiń basym bóligi kórshiles memleketterge jetkiziledi.
Sonymen qatar eksport geografııasyn odan ári keńeıtýge, onyń ishinde Aýǵanstan naryǵyna shyǵýǵa áleýeti bar. Bul týraly QR Densaýlyq saqtaý vıtse-mınıstri Tımýr Muratov «Kazakhstan–Afghanistan: Partnership for Health 2026» atty alǵashqy Qazaqstan–Aýǵanstan medıtsınalyq bıznes-forýmynda málimdedi.
Eksport kórsetkishteriniń ósýimen qatar, salaǵa ınvestıtsııa tartý jumystary da jalǵasyp otyr. 2025 jylǵy jeltoqsannan beri jalpy somasy 391,3 mlrd teńgeni quraıtyn segiz ınvestıtsııalyq kelisim jasaldy.
Kelisimder «Khan Tengri», «Hımfarm», «Nobel», «Altınfarm», «Romfarm», «Abdı Ibragım Global Farm», «Qaraǵandy farmatsevtıkalyq kesheni» jáne «Steppe» kompanııalarymen jasalǵan. Investıtsııalyq yntymaqtastyqty damytý jáne eksporttyq múmkindikterdi keńeıtý otandyq farmatsevtıka salasyn nyǵaıtyp, onyń básekege qabilettiligin arttyrýǵa jol ashady.
Forým sheńberinde 28–29 qazanda Aýǵanstan delegatsııasy Qazaqstannyń iri otandyq óndirýshileriniń óndiristik alańdaryn aralap, kásiporyndardyń óndiristik qýatymen, tehnologııalarymen jáne sapany baqylaý júıesimen tanysty.
Búginde Qazaqstanda 209 óndirýshi jumys isteıdi. Onyń 43-i dárilik zattar óndirisine, qalǵany medıtsınalyq buıymdar shyǵarýǵa mamandanǵan.
Densaýlyq saqtaý mınıstrligi otandyq jáne sheteldik óndirýshilermen turaqty dıalog júrgizip, patsıentterdiń múddeleri men farmatsevtıka salasynyń damýy arasyndaǵy tepe-teńdikti qamtamasyz etýge basymdyq beredi.
