Qazaqstan dándi daqyldardyń eksporttyq naryǵyn keńeıtip jatyr

ASTANA. KAZINFORM – Qazaqstan jyl saıyn 8-9 mln tonna astyq eksporttaıdy, onyń 6,5-7,5 mln tonnasy — bıdaı. 

Úkimettiń baspasóz qyzmeti habarlaǵandaı, eksport geografııasy 40-tan astam eldi qamtıdy. Ortalyq Azııa, Aýǵanstan, Qytaı, Túrkııa, Iran, Italııa, Týnıs elderi dástúrli naryq sanalady. Bıylǵy qarasha aıynyń sońyndaǵy jaǵdaı boıynsha 6,3 mln tonna astyq eksporttaldy. Jańa ónim eksporty 2,37 mln tonnany qurady, bul 2023 jyldyń sáıkes kezeńimen salystyrǵanda 52%-ǵa artyq.

Ózbekstanǵa jetkizilim 42%-ǵa artyp, 944 myń tonnany qurady, ótken jyly bul kórsetkish 665 myń tonna bolǵan.

Tájikstanǵa jetkizilim 49%-ǵa ósip, 2023 jylǵy 254 myń tonnadan bıyl 377 myń tonnaǵa deıin jetti. Sondaı-aq Qytaıǵa eksport kólemi 17%-ǵa ósip, ótken jylǵy 304 myń tonnadan bıyl 355 myń tonnaǵa deıin artqany baıqaldy.

Aýǵanstanǵa jetkizilimder kólemi 71%-ǵa ulǵaıyp, ótken jylǵy 67 myń tonnadan 115 myń tonnaǵa deıin artty.

Iranǵa eksport kólemi 10 myń tonnadan 30 esege artyp, 299 myń tonnany qurady.

Bıyl eksporttyq áleýet 12 mln tonnaǵa jetedi dep boljanýda. Negizgi ótkizý naryqtary – Ortalyq Azııa, Qytaı, Aýǵanstan, Italııa jáne basqa elder. Sondaı-aq Ázerbaıjan, Aýǵanstan, Iran, Irak, Soltústik Afrıka jáne EO elderine Qara jáne Baltyq teńizderiniń porttary arqyly 2 mln tonnaǵa deıingi kólemde astyq tasymaldaý máselesi pysyqtalyp jatyr. 

Jumystyń tıimdiligin arttyrý úshin Qazaqstan ishinde de, eksportqa da jóneltýdi josparlaıtyn jedel astyq shtaby quryldy. Halyqaralyq dálizder qurý jónindegi jobalardy iske asyrý arqyly eksport geografııasyn odan ári keńeıtý josparlanyp otyr.

Aıta keteıik, elimizde dándi daqyl jınaýdan rekord ornap, qarjylandyrý kólemi 580 mlrd teńgege artty.