Qazaqstan damý kórsetkishi boıynsha Ortalyq Azııada kósh bastady
ASTANA. KAZINFORM — Qazaqstan Legatum Prosperity Index 2026 (Damý ındeksi) reıtıngide Ortalyq Azııa elderi arasynda kósh bastap, álemniń 161 memleketiniń ishinde 66-orynǵa turaqtady.
Prosperity Institute jarııalaǵan ındeks 130-dan astam kórsetkish negizinde jasalady. Baǵalaý úsh negizgi baǵytty qamtıdy: damý, erkindik jáne qoǵam.
2026 jylǵy reıtıńde baǵalaý ádistemesi jańartyldy. Endi reıtıngide joǵary oryn alý úshin bir ǵana baǵyttaǵy úzdik nátıje jetkiliksiz.
Eldiń barlyq baǵyttaǵy kórsetkishi qatar eskeriledi.
Jekelegen baǵyttar boıynsha Qazaqstannyń kórsetkishteri mynadaı:
-«Damý» baǵyty boıynsha — álemde 52-oryn;
-«Qoǵam» baǵyty boıynsha — 45-oryn;
-«Qoǵamnyń tutastyǵy» (Integrity of Society) kórsetkishi boıynsha — 47-oryn.
Qazaqstan bilim berý salasynda joǵary nátıje kórsetip, álemde 32-orynǵa jaıǵasty. Sondaı-aq «Otbasynyń tutastyǵy» (Integrity of Families) kórsetkishi boıynsha 30-oryndy ıelense, ómir súrý deńgeıi boıynsha 53-orynnan kórindi.
Osylaısha, Ortalyq Azııa elderi arasynda Qazaqstan eń joǵary orynǵa ıe bolyp otyr. Odan keıin Qyrǵyzstan — 87, Ózbekstan — 94, Tájikstan — 129, Túrikmenstan 150-orynǵa jaıǵasqan. Al Reseı bul tizimde 103-orynǵa ornalasqan.
2026 jylǵy álemdik reıtıngide Shveıtsarııa birinshi orynǵa shyqty. Alǵashqy bestikke sondaı-aq Norvegııa, Irlandııa, Danııa jáne Fınlıandııa engen. Baıandamada atap ótilgendeı, Shveıtsarııa barlyq negizgi baǵyt boıynsha joǵary kórsetkishke qol jetkizip, reıtıngide birinshi orynǵa shyqqan.
Aıta keteıik, buǵan deıin Qazaqstan Áleýmettik ilgerileýdiń álemdik ındeksinde 171 eldiń ishinde 61-orynǵa turaqtaǵany habarlandy.
