Qazaqstan damý bankiniń nesıe qorjyny 1 trln 728 mlrd teńgege jetti
«Damý banki óńdeý ónerkásibi men óndiristik ınfraqurylymy jobalaryn nesıeleý dınamıkasy boıynsha oń trendti ustaýyn jalǵastyrýda. QDB-nyń nesıe qorjyny kólemi 2019 jyldyń aldyn ala qorytyndysyna sáıkes, 2018 jylmen salystyrǵanda 32 mlrd teńgege nemese 1,9 paıyzǵa artyp, 1 728 mlrd teńgege jetti. Bul rette «Báıterek» holdıngi qurylǵan 2013 jyldan beri damý bankiniń nesıe qorjyny kólemi 4,6 ese nemese 356 paıyzǵa ulǵaıdy. QDB damý ınstıtýty bolǵanymen barynsha kiris alýdy aldynda maqsat retinde qoımaıdy. Onyń qyzmeti shyǵynsyz negizde júzege asyrylady. Bank qyzmetiniń qarjylyq kórsetkishterine toqtalsam, 2019 jyldyń aldyn ala qorytyndysyna sáıkes, QDB oń qarjylyq nátıjemen aıaqtady. Aýdıttelmegen derekter boıynsha taza kiris 7,58 mlrd teńge boldy. Menshikti kapıtaldyń kólemi 424,1 mlrd teńgeni, ósim 2018 jylmen salystyrǵanda 12,8 paıyzdy qurady», - dedi ol.
Onyń aıtýynsha, 2019 jyly memlekettik qarajattyń árbir teńgesine naryqtyq sharttarmen 1,17 teńge qaryz tartyldy. QDB ótken jyly ártúrli kózderden tartqan 329,5 mlrd teńge qorlandyrý qorynyń 54 paıyzy, ıaǵnı, 177,9 mlrd teńgesi naryqtyq qarajatqa tıesili. Osylaısha, QDB bank qaryz alýshylarynyń ulttyq valıýtadaǵy nesıe resýrstaryna degen joǵary suranysyn qamtamasyz etýge umtylady. Bank kredıttik qorjynynyń qurylymyndaǵy teńgemen beriletin qaryzdyń úlesi 2018 jylǵy 43 paıyzdan 2019 jyldyń qorytyndylary boıynsha 53 paıyzǵa deıin ósti.
«Ótken jyldyń qorytyndysynda QDB 14 jobany qarjylandyrýdy maquldady. Olar: jalpy somasy 436,5 mlrd teńge bolatyn 11 ınvestıtsııalyq joba men 3 eksporttyq operatsııa», - dedi Abaı Sarqulov.
Al «Qazaqstan damý banki» AQ basqarýshy dırektory Ádil Ismaǵambetov bank Qapshaǵaı qalasyndaǵy qýaty 100 MVt SES qurylysy, «Saryarqa» magıstraldy gaz qubyrynyń qurylysy, Shymkent qalasyndaǵy metıl-tret-býtıl efırin óndiretin zaýyttyń qurylysy, Aqtoǵaı KBK qaıta óńdeý qýattaryn keńeıtý, QR aýyldyq eldi mekenderin talshyqty-optıkalyq baılanys jelileri tehnologııasy boıynsha keń jolaqty qol jetimdilikpen qamtamasyz etý, Aqmola oblysyndaǵy broıler ósiretin qus fabrıkasynyń 2 kezeńiniń qurylysy sııaqty iri jobalardy qarjylandyrǵanyn aıtady.
«2019 jyl Qazaqstannyń salalaryna zor mýltıplıkatıvtik tıimdilik beretin el úshin mańyzy bar jobalardyń paıdalanýǵa engizilýimen este qaldy. Olar: Qaraǵandydaǵy «YDD Corporation» JShS-nyń ferrosılıtsıı óndiretin joǵary tehnologııaly zaýyty, Shymkenttegi «Asia Trafo» JShS-nyń kúsh transformatorlaryn jasaıtyn zaýyty, «Saryarqa» magıstraldy gaz qubyry, Shymkent munaı óńdeý zaýytyn jańǵyrtý jáne rekonstrýktsııalaý, Atyraý munaı óńdeý zaýytynda munaıdy tereńdetip qaıta óńdeý keshenin salý.
Bank sondaı-aq jańartylatyn energııa kózderi salasyndaǵy quzyretin de belsendi túrde arttyrýda. Ótken jyly Qapshaǵaı qalasyndaǵy «Nurgisa» kún elektr stantsııasy, Túrkistan oblysyndaǵy «Jylǵa» kún elektr stantsııasy jáne Aqmola oblysyndaǵy «Astana EXPO-2017» jel elektr stantsııasy iske qosyldy», - dedi ol.
