Qazaqstan damý banki elimizde salynatyn eki gaz týrbınasy stansysyn qarjylandyrýdy bastaıdy
ANA. Qarashanyń 4-i. QazAqparat /Marlan Jıembaı/ - «Qazaqstan damý banki» AQ-y elimizde salynatyn eki gaz týrbınasy stansysyn qarjylandyrýdy bastaıdy. Bul jaıynda atalǵan banktiń tóraǵasy Ǵalı Esqalıev búgin www.bnews.kz portalynda ótken Online-konferentsııada málim etti,
dep habarlaıdy QazAqparat.
Onyń aıtýynsha, energııa tapshylyǵy bar Qyzylorda oblysynda salynatyn birinshi stansynyń qýaty 87 MgVt-qa teń. Al Oralda boı kóteretin ekinshi stansynyń qýaty - 54 MgVt.
«Batys Qazaqstan oblysynda energııa tapshylyǵy joq, degenmen bul ımportty almastyratyn joba. Atalǵan joba iske qosylǵannan keıin oblys 100 paıyz energııamen jabdyqtalatyn bolady», dedi Ǵ.Esqalıev.
Sonymen qatar bank tóraǵasy QR Úkimeti bekitken 28 strategııalyq jobanyń 19-y Qazaqstan damý bankiniń qatysýymen qarjylandyrý josparlanǵanyn atap ótti.
«Qazaqstan damý banki 2011 jylǵy Qysqy Azııa oıyndary qarsańynda boı kóteretin Shymbulaq taý shańǵysy kesheni, Pavlodardaǵy hlorly-siltili óndirisi, Taraz ferroqorytpalar zaýyty sııaqty jobalardy qarjylandyrady. Taǵy da osyndaı 12 joba bar. Qazirgi ýaqytta atalǵan jobalardy qarastyryp jatyrmyz. Sheshim áli qabyldanbaǵandyqtan men qazir ol jobalar týraly málimet bere almaımyn», dedi ol.
