Qazaqstan damý banki el ekonomıkasyna 400 mlrd teńge ınvestıtsııa salady
«Qazaqstan damý banki 2017 jyldy oń qarjylyq nátıjemen aıaqtap, shoǵyrlandyrylǵan taza kiris 4,8 mlrd teńgeni qurady. 2016 jylmen salystyrǵanda esepti kezeńde bank aktıvi 5 paıyzǵa artyp, 2,5 trln teńgege deıin jetti. 2017 jyldyń ishinde bank 406 mlrd teńge ınvestıtsııa tartyp, 345,3 mlrd teńge somasyndaǵy mindettemesin ótedi», - dedi Bolat Jámishev.
Onyń dereginshe, ótken jyldyń qorytyndysynda QDB-nyń klıentterge bergen zaımdar qorjyny 2016 jylmen salystyrǵanda 7,3 paıyzǵa artyp, 1 trln 493 mlrd teńgege jetken. Kredıttik qorjyn kólemi 1 trln 561 mlrd teńgeni quraǵan. Al aǵymdaǵy jyly bank elimizdiń shıkizattyq emes sektoryn damytýǵa 405 mlrd teńge jumsaýdy josparlap otyr.
«2017 jyly Qazaqstannyń respýblıkalyq bıýdjet qarajatynyń árbir teńgesine naryqtyq sharttarmen 2,22 teńge zaım tartyldy. Ótken jyly Qazaqstan damý banki ártúrli kózderden tartqan qorlandyrý kólemindegi 406 mlrd teńgeniń tek 31,1 paıyzy ǵana bıýdjet qarajaty boldy», - dedi bank basshysy.
