Qazaqstan Damý Banki bıznes-protsesterdi ońtaılandyrý jumystaryn jalǵastyrady

ASTANA. QazAqparat - Qazaqstan Damý Banki bıznes-protsesterdi ońtaılandyrý boıynsha aýqymdy jumystardy jalǵastyrady. Bul týraly búgin Ortalyq kommýnıkatsııalar qyzmetinde ótken brıfıngte «Qazaqstan Damý Banki» AQ Basqarma Tóraǵasy Bolat Jámishev málim etti.

Tóraǵanyń aıtýynsha, byltyrǵy jyly bıznes qaýymdastyǵy bank jumysynyń tıimdiligi jetkiliksiz ekenin aıtyp, synǵa alǵan bolatyn. Osyǵan baılanysty bank birqatar sarapshy-konsýltanttardy tarta otyryp, barlyq problemaly máselelerdi qaıta baǵalap, bıznes-protsesti jetildirý úlgisin ázirlep shyqty.

«Bıznes-protsesti jetildirý baǵytynda biz aýqymdy jumystardy atqardyq. Buǵan deıin bári birigip kelgen klıenttik menedjerdiń, kredıttik sarapshynyń, monıtorıng jónindegi mamannyń fýnktsııalary bólindi. Máselen, endi klıenttik menedjer yqtımal klıentterdi tartý jumysymen, kredıttik sarapshy - kredıttik taldaýmen, isti qurylymdaýmen aınalysady. Al monıtorıng mamany jobalarǵa qatysty «dabyldardy», keri qubylystardy erte bastan anyqtaýdy qolǵa alady», - dedi B. Jámishev.

Tóraǵanyń sózine qaraǵanda, kredıttik taldaý men aldyn ala saraptaý úderisteri de jetildirilgen. Máselen, jobalardy alodyn ala qaraý bir apta ishinde ótinim berýshi toltyrǵan anketa negizinde qaralady. «ıAǵnı, biz ótinim berýshiden qaptaǵan qujattardy suratpaımyz, olar shekteýli ǵana. Bul rette ótinish jasaýshy anketa toltyryp, onda ol óziniń jobasyn ózi baǵalaıtyn bolady. Bul ýaqytty edáýir únemdeıdi», - deıdi B. Jámishev.