Qazaqstan Damý banki Jetisýdaǵy elektr jelilerin jańǵyrtýǵa 9 mlrd teńge bóledi
ASTANA. KAZINFORM – Qazaqstannyń Damý banki men «Taldyqorǵan aktsıonerlik kólik-elektr jelileri kompanııasy» AQ 9,16 mlrd teńge kóleminde kredıt jelisin ashý týraly kelisimge qol qoıdy.
Joba «EKSJ» ulttyq jobasy aıasynda júzege asyrylady jáne Jetisý oblysyndaǵy elektr jelisi ınfraqurylymyn jańǵyrtýǵa baǵyttalǵan.
Qarjylandyrý aıasynda Taldyqorǵan, Úshtóbe, Sarqan qalalary, sondaı-aq Kóksý, Qaratal, Eskeldi, Kerbulaq jáne Aqsý aýdandaryndaǵy elektr jelileri jańartylady.
Atap aıtqanda, ártúrli kerneýdegi 465 shaqyrymnan astam elektr berý jelisi qaıta jańǵyrtylyp, kabel jelileri jańartylady. Sonymen qatar eki iri qosalqy stansa rekonstrýktsııadan ótedi.
– Bul joba óńirdegi elektrmen jabdyqtaý júıesiniń senimdiligin arttyrýǵa jáne ınfraqurylymdy jańǵyrtýǵa múmkindik beredi, – dep atap ótti jobaǵa qatysýshylar.
Joba Qazaqstannyń Damý banki tarapynan «EKSJ» aıasynda qoldaý tapqan tabıǵı monopolııalar sýbektileriniń ekinshi jobasy bolyp otyr.
Jalpy alǵanda, mundaı jobalar elektr jelisimen qamtylǵan óńirlerde 1,5 mıllıonnan astam turǵynǵa qyzmet kórsetý sapasyn arttyrýǵa múmkindik beredi.
Nysandardy paıdalanýǵa berý 2027 jylǵy qańtarǵa josparlanǵan.
Aıta keteıik, buǵan deıin Qazaqstanda elektr energııasyn óndiretin qurylǵylardyń jartysynan astamy ábden eskirgeni habarlanǵan bolatyn.
