Qazaqstan damý banki «Qazatomónerkásipke» 113 mlrd teńge bólmekshi

ASTANA. KAZINFORM – Qazaqstan damý bankiniń basshylyǵy ıtalııalyq tehnologııamen kúkirt qyshqylyn óndiretin zaýyt qurylysyna 113 mlrd teńgeniń nesıe jelisin ashý týraly sheshim qabyldady.

- «Qazaqstannyń Damý Banki» AQ («Báıterek» ulttyq holdınginiń quramyna kiredi) jáne «Taiqonyr Qyshqyl Zauyty» JShS jobalyq kompanııa Túrkistan oblysynyń Taıqońyr aýylynda qýaty jylyna 800 myń tonna ónim óndiretin kúkirt qyshqyly zaýytyn salý jónindegi ınvestıtsııalyq jobany iske asyrýǵa kredıttik jeli ashý týraly kelisimge qol qoıdy. Jobanyń jalpy quny – 113 mlrd teńge. Joba aıasynda tolyq tsıkldi tehnologııalar, jabdyqtar men ınjınırıngtik qyzmetterdi usynatyn ıtalııalyq Ballestra kompanııasy tehnologııalyq seriktes retinde tartylǵan. Zaýyt Túrkistan oblysy Sozaq aýdany Taıqońyr aýylyndaǵy ýran kenishterine jaqyn ornalasady. Bul kúkirt qyshqyly – ýran óndirýde qoldanylatyn uńǵymalyq siltisizdendirý tehnologııasy úshin negizgi reagent – logıstıkasyn ońtaılandyrýǵa múmkindik beredi. Ónimniń negizgi tutynýshysy – «Qazatomónerkásip» UAK» AQ, - dep jazylǵan resmı málimette.

Zaýytty 2027 jyldyń birinshi toqsanyna deıin salyp bitirý kózdelip otyr. Bul zaýyt iske qosylsa, «Qazatomónerkásip» kompanııasy kúkirt qyshqylynyń ımportyn azaıtar edi.

- Qurylys kezeńinde 500-ge deıin adam, al joba iske qosylǵannan keıin 274 maman turaqty jumyspen qamtylady. Sondaı-aq bul joba óńirlik ınfraqurylymdy damytýǵa jáne áleýmettik turaqtylyqty nyǵaıtýǵa yqpal etedi, - dep jazady QDB mamandary.

Eske salsaq, naýryz aıynda Prezıdent Qasym-Jomart Toqaevqa «Qazatomónerkásip» ulttyq atom kompanııasyn» damytýdyń 2025-2034 jyldarǵa arnalǵan jańa strategııasy tanystyrylǵan edi.