Qazaqstan damý banki AÓK jobalaryn 1,2 trln teńgege qarjylandyrady
ASTANA. KAZINFORM — Bul týraly Qazaqstan Premer-Mınıstri Oljas Bektenovke jumys keńesi barysynda «Qazaqstan damý banki» AQ basqarma tóraǵasy Marat Elibaev baıandady.
Memleket basshysy Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty halyqqa Joldaýyn iske asyrý sheńberinde bank aýyl sharýashylyǵyn damytý boıynsha basym baǵyttarǵa taldaý jasady.
Olardyń ishinde et, sút jáne astyqty tereń óńdeý, ónerkásiptik jylyjaı sharýashylyǵyn damytý, qus fabrıkalaryn, kókónis qoımalaryn jáne etti mal sharýashylyǵy kásiporyndaryn salý máselesi bar.
Marat Elibaev QDB-nyń ekinshi deńgeıli banktermen jáne basqa da qarjy ınstıtýttarymen birlese otyryp, agroónerkásip keshenindegi ınvestıtsııalyq jobalardy iske asyrý úshin jalpy somasy 1 trln 220 mlrd teńgege qarjylandyrýdy qamtamasyz etýge daıyn ekendigi týraly baıandady.
Qazirgi ýaqytta bank otandyq ınvestorlardyń jańa jobalaryn qaraýǵa kiristi.
Úkimet basshysy Oljas Bektenov bank basshylyǵyna azyq-túlik qaýipsizdigin qamtamasyz etýge, ımportty almastyrýǵa jáne otandyq aýyl sharýashylyǵy ónimderiniń eksportyn ulǵaıtýǵa baǵyttalǵan ınvestıtsııalyq jobalarǵa basymdyq bere otyryp qaraýdy tapsyrdy.
Aıta ketý kerek, QDB-nyń agroónerkásip sektorynda jobalardy júzege asyrýda tájirıbesi bar.
Onyń ishinde Aqmola oblysynda et óndiretin qus fabrıkasyn, maıly daqyldar óńdeý zaýyttaryn salý jáne jańǵyrtý jumystaryn atap kórsetýge bolady.
Sondaı-aq banktiń qarjylandyrýymen Túrkistan oblysynda elimizdegi eń iri jylyjaı kesheniniń qurylysy bastaldy, onyń birinshi kezeńi kelesi jyly iske qosylady dep josparlanyp otyr.
