Qazaqstan dalasyna 4,2 myńǵa jýyq jek-dýadaq jiberildi

NUR-SULTAN. QazAqparat – QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti jabaıy tabıǵatqa 4160 jek-dýadaqty jiberdi. Bul týraly komıtettiń baspasóz hatshysy Sáken Dildahmet Facebook-paraqshasynda jazdy, dep habarlaıdy QazAqparat tilshisi.

Jumystar Jek-dýadaqty qorǵaý halyqaralyq qorymen birlesip atqarylǵan. Jek-dýadaqtyń 3236-y Birikken Arab Ámirlikteriniń, al 924-i Qazaqstannyń tálimbaqtarynda (Túrkistan oblysy) ósirilgen.

«Qustar Almaty, Mańǵystaý, Túrkistan men Qyzylorda oblysynyń aýmaǵyna jiberildi. Jalpy 2009-2019 jyldar aralyǵynda Qazaqstannyń tabıǵatyna 20 489 jek-dýadaq jiberilgen. Praktıkalyq baqylaýǵa qaraǵanda olardyń 50 paıyzy tirshilikke beıimdelip kete alady», - dep jazady Sáken Dildahmet.

Jalpy jek-dýadaqtar 2009 jyldan beri qazaq dalasyna jiberilip keledi. Azııa popýlıatsııasynyń qustary osyndaǵy jaǵdaıǵa beıimdelip, kúzdigúni qysty ótkizý úshin ushyp ketedi. Jyly jaqtan oralǵannan keıin kóktemde qaıtyp kelip, osynda balapandaıdy. Qustyń bul túri Qazaqstannyń Qyzyl kitabyna engizilgen. Olardyń joıylyp ketý qaýpi bar.