Qazaqstan daǵdarysqa qarsy sharalar boıynsha eń alǵa jyljyǵan memlekettterdiń ondyǵyna kirdi - reseılik sarapshy

ASTANA. Sáýirdiń 16-sy. QazAqparat - Daǵdarys sabaqtary memlekettiń ekonomıkalyq úderisterge aralasýy aqtalatyndyǵyn kórsetip otyr. Bul pikirdi búgin Bnews.kz portaly stýdııasynda ótken ınternet-konferentsııa barysynda reseılik «Bıznes yntymaqtastyq» úkimettik emes uıymynyń dırektory, «Daǵdarystan keıin damý modelderi» zertteýleri avtorlarynyń biri Vıtalıı Sednev bildirdi.

«Buny 2007-2009 jyldary aralyǵynda Qazaqstan óziniń daǵdarysqa qarsy saıasatynda anyq kórsetti. Bizdiń zertteýlerimizdiń qorytyndysy boıynsha, Qazaqstan tipti Japonııa syndy memlekettiń ózin artqa tastap, daǵdarysqa qarsy sharalar boıynsha eń alǵa jyljyǵan memleketterdiń ondyǵyna kirdi», dedi V.Sednev.

Sarapshynyń atap ótýinshe, daǵdarysqa qarsy bastama daǵdarystan keıingi sekiris úshin jaqsy múmkindik beredi.

«Daǵdarystyń ekinshi sabaǵy - bul ishki naryqtyń jáne ulttyq kapıtaldyń róliniń qaıta baǵalanýy. Eger burynǵy ǵalamdaný modeli barysynda memlekettiń jedel damýynyń negizgi motory syrtqy naryqqa shyǵý jáne ekonomıkalyq ǵalamdanýdyń jalpy órisine ený retinde qarastyrylsa, endigi ýaqytta basty motor óńirlik saýda odaqtaryn, ishki naryqty jáne ulttyq kapıtaldy damytý bolýy qajet», dep qorytty oıyn reseılik sarapshy.