Qazaqstan daǵdarysqa qarsy is-sharalardan ornyqty damý baǵytyna kóshedi - Ulttyq bank
ASTANA. QazAqparat - Qazaqstan daǵdarysqa qarsy is-sharalardan ornyqty damý baǵytyna kóshedi. Bul týraly Qazaqstan Respýblıkasy Úkimetiniń jáne Qazaqstan Respýblıkasy Ulttyq bankiniń ekonomıkalyq saıasattyń 2018 jylǵa arnalǵan negizgi baǵyttary jónindegi málimdemesinde aıtylǵan, dep habarlaıdy QazAqparat.
«Ulttyq banktiń pikirinshe, 2018 jyly biz daǵdarysqa qarsy is-sharalardan ornyqty damý baǵytyna kóshemiz. Bul jaǵdaıda taıaý jyldarǵa arnalǵan ósýdiń negizgi qozǵaýshy kúshin nyǵaıtý qajet. Ulttyq banktiń jáne Úkimettiń birlesken málimdemesin qabyldaý jáne kelisilgen sharalardy júzege asyrý makroekonomıkalyq saıasattyń uzaq merzimdi maqsattaryna qol jetkizýdi qamtamasyz etýge múmkindik beredi», - dedi málimdeme jobasyn tanystyrǵan Ulttyq bank tóraǵasy Danııar Aqyshev.
Onyń aıtýynsha, ótken jyly ınflıatsııalyq protsesterdi turaqtandyrý salasyndaǵy, sol sııaqty Qazkommertsbanktiń jáne RBK banktiń problemalaryn sheshý máselelerindegi birlesken is-qımyldy júzege asyrý eldegi makroekonomıkalyq ahýaldyń jaqsarýyna yqpal etti.
2017 jyldyń 4 toqsanynda tólem balansynyń aǵymdaǵy shoty nóldik saldosyna jetti. Negizgi eksporttyq taýarlar baǵalarynyń qalpyna kelýi jáne dálme-dál baǵam saıasaty 2015, 2016, 2017 jyldarda baıqalǵan toqsandyq aǵymdaǵy shottyń edáýir tapshylyǵynan alǵashqy ret ketýge múmkindik berdi.
«Bul eldegi tólem balansynda teńgerimsizdik týdyrmaıtyn aıyrbas baǵamynyń deńgeıi durys ekenin bildiredi. Syrtqy naryqtaǵy jaǵymdy jaǵdaı jáne makroekonomıkalyq turaqtylyq saqtalǵan kezde biz 2018 jyly oń úrdister jalǵasady dep kútemiz», - dedi Danııar Aqyshev.
