Qazaqstan Coursera sheshimi negizinde ulttyq tsıfrlyq bilim berý platformasyn qurmaq
ASTANA. KAZINFORM – QR Prezıdenti Qasym-Jomart Toqaevtyń Amerıka Qurama Shtattaryna resmı sapary aıasynda Vashıngton qalasynda QR Ǵylym jáne joǵary bilim mınıstrligi men álemdegi jetekshi onlaın-bilim berý platformalarynyń biri – Coursera kompanııasy arasynda ózara túsinistik týraly memorandýmǵa qol qoıyldy. Bul týraly Ǵylym jáne joǵary bilim mınıstrligi málimdedi.
Qujatqa QR Ǵylym jáne joǵary bilim mınıstri Saıasat Nurbek pen Coursera kompanııasynyń ókilderi qol qoıdy. Memorandým aıasynda akademııalyq yntymaqtastyqtyń jańa formalaryn damytý jáne bilim berý úderisine ozyq tsıfrlyq quraldardy engizý kózdelgen. Atap aıtqanda, yntymaqtastyq jasandy ıntellekt tehnologııalaryn paıdalaný arqyly proktorıng jáne bilimdi baǵalaý júıelerin engizýdi qamtıdy. Bul stýdentterdiń oqý jetistikterin baǵalaýda ashyqtyq pen obektıvtilikti arttyrýǵa múmkindik beredi.
Yntymaqtastyqtyń negizgi baǵyttaryna qazaqstandyq stýdentter men oqytýshylar úshin álemniń jetekshi ýnıversıtetteriniń onlaın baǵdarlamalaryn damytý, bilim alýshylar men pedagogterdi halyqaralyq standarttar boıynsha sertıfıkattaý, sondaı-aq Coursera sheshimderi negizinde ulttyq tsıfrlyq bilim berý platformasyn qurý kiredi.
Seriktestik onlaın-bilim berý jáne tsıfrlyq transformatsııa salasyndaǵy birlesken jobalar arqyly júzege asyrylady.
Kelisimniń mańyzy – Qazaqstannyń Ortalyq Azııadaǵy tsıfrlyq bilim berý jáne jasandy ıntellekt quzyretterin damytý ortalyǵy retindegi pozıtsııasyn nyǵaıtýynda. Bul bastama elimizdiń jahandyq bilim keńistigine ıntegratsııalanýyna jáne ulttyq joǵary bilim berý júıesiniń básekege qabilettiligin arttyrýǵa mańyzdy qadam bolmaq.
Memorandýmǵa qol qoıý oqıǵany elimizdiń tsıfrlandyrý, ınnovatsııalyq damý jáne halyqaralyq yntymaqtastyqqa ashyqtyq baǵytyndaǵy strategııalyq baǵytynyń jalǵasy retinde baǵalaýǵa bolady.
Aıta keteıik, otandyq JOO-lar ChatGPT Edu bilim berý platformasyna qosylady.