Qazaqstan COP31 konferentsııasynda klımattyq ınvestıtsııalar platformasyn tanystyrdy
ASTANA. KAZINFORM — Qazaqstan Antalıada ótken COP31 konferentsııasynda klımattyq jobalardy qarjylandyrý tetigin tanystyrdy.
BUU-nyń Klımattyń ózgerýi týraly negizdemelik konventsııasy taraptarynyń 31-konferentsııasyndaǵy (COP31) Qazaqstannyń ulttyq pavılonynda Qazaqstannyń klımattyq ınvestıtsııalar jónindegi eldik platformasy (QCIP) tanystyryldy. Jańa tetik tómen kómirtekti ekonomıkany damytýǵa baǵyttalǵan jobalardy júzege asyrý úshin memlekettik organdardy, halyqaralyq qarjy uıymdaryn, klımattyq qorlar men jeke ınvestorlardy biriktirýdi kózdeıdi.
Platformanyń negizgi mindeti — basym klımattyq jobalar qorjynyn qalyptastyrý, olardyń ınvestıtsııalyq tartymdylyǵyn arttyrý jáne ishki ári halyqaralyq qarjy kózderine qol jetkizýge múmkindik jasaý. QCIP ekonomıkanyń túrli salasyn qamtyp, memleket, qarjy ınstıtýttary men bıznes arasyndaǵy baılanysty úılestiretin biryńǵaı alańǵa aınalmaq.
Platformaǵa Qazaqstannyń Ekologııa jáne tabıǵı resýrstar mınıstrligi jetekshilik etedi. Al onyń hatshylyq mindeti Jasyl tehnologııalar jáne ınvestıtsııalyq jobalardyń halyqaralyq ortalyǵyna (IGTIC) júktelgen.
QCIP-tiń negizgi baǵyttarynyń biri — Qazaqstannyń Ádiletti energetıkalyq kóshý jónindegi ınvestıtsııalyq platformasy (QaJET). Ony Energetıka mınıstrligi Eýropalyq qaıta qurý jáne damý bankiniń qoldaýymen ázirlep jatyr. Platforma jańartylatyn energetıkany damytýǵa, elektr jelilerin jańǵyrtýǵa, energııa jınaqtaý júıelerin engizýge jáne elektrlendirý aýqymyn keńeıtýge baǵyttalǵan. Atap aıtqanda, 2035 jylǵa deıin jańartylatyn energııa kózderiniń qýatyn keminde 10 GVt-qa jetkizý mindeti qoıylǵan.
Іs-shara barysynda yntymaqtastyq týraly eki memorandýmǵa qol qoıyldy. Birinshisi QCIP aıasynda Jasyl tehnologııalar jáne ınvestıtsııalyq jobalardyń halyqaralyq ortalyǵy men Qazaqstannyń Damý banki arasyndaǵy ózara is-qımyldy kózdeıdi. Ekinshi qujatqa Energetıka mınıstrligi, Ekologııa jáne tabıǵı resýrstar mınıstrligi jáne EQDB bastaǵan QaJET seriktesteri qol qoıdy. Bul qujatqa qol qoıý salalyq platformanyń resmı iske qosylǵanyn bildiredi.
QCIP qurý klımattyq maqsattardy jarııalaýdan olardy halyqaralyq jáne jeke kapıtal tartý arqyly naqty jobalarǵa aınaldyrýǵa baǵyttalǵan. Sondaı-aq jańa tetik Qazaqstan ekonomıkasyn ekologııalyq turǵydan jańǵyrtýǵa qarjy ınstıtýttary men ınvestorlardyń qatysýyn keńeıtýdi kózdeıdi.
Eske salaıyq, buǵan deıin BUU-nyń COP31 klımattyq konferentsııasy búgin, 9 qarashada Antalıa qalasynda bastalǵanyn habarlaǵan edik.
