Qazaqstan COP31 konferentsııasynda basym klımattyq tehnologııalaryn tanystyrdy

ASTANA. KAZINFORM — Qazaqstan klımattyq tehnologııalardy engizý jáne jasyl ekonomıkany damytý úshin halyqaralyq ınvestıtsııa tartýdy kózdeıdi. Bul týraly Kazinform agenttiginiń Ankaradaǵy menshikti tilshisi habarlady.

Qazaqstan COP31 konferentsııasynda basym klımattyq tehnologııalaryn tanystyrdy
Foto: Aqjigit Shúkibaev/Kazinform

Basym sheshimderdiń ulttyq portfeli BUU-nyń Klımattyń ózgerýi jónindegi 31-konferentsııasynda (COP31) Antalıada tanystyryldy. Tusaýkeser Qazaqstannyń ulttyq pavılonynda Halyqaralyq jasyl tehnologııalar jáne ınvestıtsııalyq jobalar ortalyǵy (IGTIC) QR Ekologııa jáne tabıǵı resýrstar mınıstrligimen jáne halyqaralyq seriktestermen birlesip uıymdastyrǵan sessııa aıasynda ótti.

Tehnologııalyq qajettilikterdi ekinshi ret baǵalaý (TNA) qorytyndysy boıynsha Qazaqstan úsh baǵytty basymdyq retinde belgiledi. Olar — energetıka, sý turaqtylyǵyn arttyrýdy qamtıtyn aýyl sharýashylyǵy jáne aınalmaly ekonomıka. Bul baǵyttar eldiń jańartylǵan Ulttyq deńgeıde aıqyndalatyn úlesine jáne 2060 jylǵa qaraı kómirtegi beıtaraptyǵyna qol jetkizý maqsatyna sáıkes keledi.

Qatysýshylar negizinen qarjylandyrý tartý, ınvestıtsııalyq táýekelderdi azaıtý jáne klımattyq bastamalardy naqty iske asyrýǵa daıyndaý máselelerin talqylady. Jıynǵa halyqaralyq damý bankteriniń, klımattyq qorlardyń jáne BUU-nyń beıindi uıymdarynyń ókilderi qatysty.

IGTIC basqarma tóraǵasy Sáken Qalqamanov tehnologııalyq basymdyqtardy Qazaqstannyń eldik klımattyq ınvestıtsııalyq platformasyna biriktirý tetigin tanystyrdy. Bul platforma perspektıvaly jobalardy bir jerge toptastyrýǵa, ınvestorlarmen baılanysty jeńildetýge jáne uzaq merzimdi kapıtal tartýǵa jaǵdaı jasaýǵa baǵyttalǵan.

Іs-shara sońynda Qazaqstan halyqaralyq qarjy ınstıtýttary men jeke ınvestorlardy basym bastamalardy, sonyń ishinde birlesip qarjylandyrý arqyly júzege asyrýǵa úndedi.

Bul jumystyń nátıjesi tehnologııalyq qajettilikterdiń naqty qarjylyq modeli bar daıyn ınvestıtsııalyq jobalarǵa qanshalyqty jyldam aınalatynyna baılanysty bolmaq. Qalyptasqan baza sheteldik kapıtal tartýǵa, tehnologııalar transferin damytýǵa jáne jasyl ekonomıka salasyndaǵy óńirlik yntymaqtastyqty nyǵaıtýǵa múmkindik beredi.

Eske salaıyq, buǵan deıin Qazaqstan, Ózbekstan jáne Qyrǵyzstan ekologııalyq baqylaýdyń tsıfrlyq quraldaryn birlese ázirleýge keliskenin jazǵanbyz.

Qujat sarapshylyq bilim, tehnologııalyq sheshimder jáne eń jaqsy tájirıbeler alysýdy, sondaı-aq Ortalyq Azııanyń úzdik qoljetimdi ádister bıýrosynyń aımaqtyq baǵdarlamasyn iske asyrý boıynsha is-qımyldardy úılestirýdi kózdeıdi.