Qazaqstan, Clearbrook jáne AG-Tech energııa saqtaý júıelerin óndiretin zaýyt salady
ASTANA. KAZINFORM – Jasandy ıntellekt jáne tsıfrlyq damý mınıstrligi, Clearbrook Energy Solutions (CES) kompanııasy jáne qazaqstandyq AG-Tech Qazaqstanda energııa saqtaý júıelerin (BESS) óndiretin zaýyt salýǵa baǵyttalǵan ózara túsinistik týraly memorandýmǵa qol qoıdy.
Mınıstrlik málimetinshe, qujatqa qol qoıý rásimi Vashıngton qalasynda, C5+1 bıznes-konferentsııasynyń aıasynda ótti. Joba Qazaqstannyń energetıkalyq aýysý strategııasyndaǵy mańyzdy qadam bolmaq. Ol eldiń energetıkalyq qaýipsizdigin nyǵaıtyp, jańartylatyn energııa kózderin ıntegratsııalaýǵa múmkindik beredi. Jalpy ınvestıtsııa kólemi – 350 mıllıon AQSh dollary. Clearbrook kompanııasy vırtýaldy elektr stantsııalary men energııa saqtaýǵa arnalǵan tehnologııalardy usynsa, AG-Tech - eldiń energetıkalyq ınfraqurylymyna tsıfrlyq sheshimderdi beıimdeý men ıntegratsııalaýdy qamtamasyz etedi.
– Bul joba Qazaqstan úshin strategııalyq mańyzǵa ıe. Ol tsıfrlyq ınfraqurylym men ulttyq tehnologııalyq jobalardy júzege asyrýda mańyzdy bolyp sanalatyn turaqty ári senimdi energııa júıesin qurýǵa múmkindik beredi, - dedi Premer-mınıstr orynbasary, Jasandy ıntellekt jáne tsıfrlyq damý mınıstri Jaslan Mádıev.
– Qazaqstan energetıkalyq táýelsizdigi men tsıfrlyq ınfraqurylymyn nyǵaıtý baǵytynda batyl qadamdar jasap jatyr. Clearbrook Energy Solutions kompanııasy Qazaqstan Úkimeti jáne AG-Tech kompanııasymen seriktestik ornatýǵa múmkindik týǵanyna qýanyshty. Bul seriktestik Qazaqstannyń tsıfrlyq ekonomıkasyn damytý men taza energııaǵa kóshýiniń negizi bolatyn zamanaýı energııa saqtaý tehnologııalaryn jergiliktendirýge baǵyttalǵan, – dedi Clearbrook kompanııasynyń Ortalyq Azııadaǵy tóraıymy Marsııa-Elızabeta Krıstıan Favale.
Aıta keteıik, Qazaqstanda SAF avıatsııalyq otynyn óndiretin zaýyt salynbaq.