Qazaqstan Cisco kompanııasymen jańa tehnologııalyq múmkindikterdi birlesip júzege asyrady
ASTANA. KAZINFORM – Jasandy ıntellekt jáne tsıfrlyq damý mınıstrligi men jelilik tehnologııalar men kıberqaýipsizdik salasyndaǵy jahandyq kóshbasshy Cisco kompanııasy jasandy ıntellekt, joǵary ónimdi esepteýler, tsıfrlyq transformatsııa salalaryndaǵy strategııalyq yntymaqtastyqty nyǵaıtýǵa baǵyttalǵan ózara túsinistik týraly memorandýmǵa qol qoıdy.
Qol qoıý rásimi C5+1 formatyndaǵy bıznes-konferentsııa barysynda ótti. Oǵan QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev pen Cisco kompanııasynyń memlekettik organdarmen strategııa jónindegi aǵa vıtse-prezıdenti Djeff Kempbell qatysty.
Mınıstrlik málimetinshe, memorandým aldaǵy bes jyl ishinde JI ınfraqurylymyn damytý, quzyretterdi arttyrý jáne Qazaqstannyń óńirlik tehnologııalyq hab retindegi pozıtsııasyn nyǵaıtýǵa baǵyttalǵan birlesken bastamalardy iske asyrýdy kózdeıdi.
– Búgin qol qoıylǵan ózara túsinistik týraly memorandým Cisco-nyń Qazaqstanmen yntymaqtastyǵyn tereńdetip, JI negizindegi tsıfrlyq transformatsııa strategııasyn jedeldetýge múmkindik beredi. JI ekojúıesiniń tabysty damýy Cisco tehnologııalarynyń ózegi bolyp sanalatyn senim men qaýipsizdikke negizdeledi. Biz Qazaqstannyń JI jáne ınnovatsııa salasyndaǵy maqsatyn qoldaýǵa daıynbyz, bul eldiń uzaq merzimdi ekonomıkalyq tabysyna yqpal etedi, - dedi Cisco kompanııasynyń memlekettik organdarmen ózara is-qımyl strategııasy jónindegi aǵa vıtse-prezıdenti Djeff Kempbell.
Memorandýmǵa qol qoıý eki taraptyń uzaq merzimdi seriktestikke jáne kıberqaýipsizdik, tsıfrlyq memlekettik basqarý, densaýlyq saqtaý jáne ulttyq aqparattyq platformalardy damytý baǵyttarynda jańa tehnologııalyq múmkindikterdi birlese júzege asyrýǵa degen nıetin rastady.
– Qazaqstannyń ozyq tehnologııalardy damytý jáne engizýge degen umtylysyn joǵary baǵalaımyz jáne osy yntymaqtastyq aıasynda ulttyq mańyzy bar bastamalardy ári qaraı qoldaýǵa daıynbyz,- dedi Cisco kompanııasynyń Túrkııa, Rýmynııa jáne TMD boıynsha basqarýshy dırektory Dıdem Dýrý.
Aıta keteıik, Cointelegraph Qazaqstanda Web3 ekojúıesin damytýǵa kómektesedi.