Qazaqstan tsıfrlyq dáýirde jahandyq trendterdi oń baǵalap otyr - QHR sarapshysy

BEIJІŃ. QazAqparat - QR Prezıdenti Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy Qytaıdaǵy ǵylymı ortanyń zor qyzyǵýshylyǵyn týdyrdy. Elbasynyń Joldaýyna qatysty «QazAqparat» HAA tilshisine Qytaı qoǵamy ǵylymı Akademııasynyń (QQǴA) Reseı, Shyǵys Eýropa jáne Ortalyq Azııa ınstıtýtynyń (RShEOAI) professory Chjao Hýeıjý óziniń pikirin bildirdi.

«Menińshe, Prezıdent Nursultan Nazarbaevtyń Qazaqstan halqyna arnalǵan qazirgi Joldaýy eldiń ilgeri qadam basýy kezeńinde mańyzy óte joǵary dep oılaımyn. Joldaý jospary negizinde halyqpen birlese eńbek etý Qazaqstanda 1997 jyly bastalǵan edi. Osy aralyqta N.Nazarbaev eki úlken: «Qazaqstan-2030» jáne «Qazaqstan-2050» strategııasyn jarııalaǵan bolatyn. Osyǵan deıingi Joldaýlar atalǵan strategııalardy júzege asyrý boıynsha áreket etýdiń negizi retinde ról atqaryp keledi. Búgingi Joldaý Qazaqstannyń tsıfrlyq kezeńde jahandyq trendterdiń damýyna jáne qazirgi zamandaǵy halyqaralyq ahýaldarǵa shynaıy baǵa berip otyrǵanyn kórsetedi», - deıdi Chjao Hýeıjýn.

Sarapshynyń aıtýynsha, Joldaýda belgilengen tapsyrmalar aldaǵy ýaqytta da Qazaqstan men Qytaıdyń yntymaqtastyǵyn nyǵaıtyp, ındýstrııaldyq, tsıfrlyq, qarjylyq, kólik-kommýnıkatsııalyq, aýyl sharýashylyǵy men ózge de salalarda, sonymen birge «Bir beldeý - bir jol» aıasynda seriktestikgin damytýǵa serpin beredi.

Chjao Hýeıjýn Qytaı ustanyp otyrǵan «Bir beldeý - bir jol» baǵdarlamasynyń júzege asyrylyýynda Qazaqstannyń sheshýshi ról atqaratynyn aıty. Sonymen qatar ol Qazaqstanmen seriktestikti nyǵaıtýǵa Sı Tszınpın erekshe mańyz beretinin jáne Qytaı basshysynyń Nursultan Nazarbaevpen qarym-qatynasy jaqsy ekenin atap ótti.

«Qytaı Qazaqstanǵa 40 mlrd AQSh dollarynan kóp ınvestıtsııa quıdy. Bul «Bir beldeý - bir jol» baǵdarlamasyna qatysýshy elderdiń ishinde eń joǵary kórsetkish ekenin aıta ketken jón. Qazaqstan «EKSPO-2017» kórmesin tabysty ótkizdi. Bıyl kórme nysandarynda «Astana» halyqaralyq qarjy ortalyǵy jumysyn bastaıdy. Meniń oıymsha, ortalyq tsıfrlandyrý dáýirinde Joldaýda kórsetilgen mindetter mańyzdy ról atqarady», - deıdi ol.

Bıyl Qytaıdaǵy reformalar men ashyqtyq saıasatynyń júrgizilip kele jatqanyna 40 jyl tolady. Osy aralyqta Qytaı birshama tájirıbe jınaqtap, óz damýynyń jańa joldaryn belgiledi.

Chjao Hýeıjýnnyń aıtýynsha, Qytaı aldyna qoıyp otyrǵan maqsattar Nursultan Nazarbaevtyń Qazaqstan halqyna arnaǵan Joldaýyndaı jańa dáýirdiń talaptaryna jaýap beredi.

«QR men QHR-nyń yntymaqtastyǵynyń damýy jolynda jańa múmkindikterge jol ashatyn Nursultan Nazarbaevtyń qazirgi Joldaýyna saraptama, zertteý jumysyn júrgizýdi jalǵastyra beremiz», - deıdi sarapshy.

Eske sala ketsek, Qytaı qoǵamy ǵylymı akademııasy (QQǴA) joǵary akademııalyq qurylym bolyp tabylady. Ol qoǵamdyq jáne áleýmettik ǵylym salasyndaǵy ǵylymı zertteýlerdi júrgizedi. Akademııa álemniń iri qalalarynda fılıaldary bar keshendi zertteý ortalyǵy retinde jumys júrgizedi.