Qazaqstan tsıfrlandyrýda ǵajaıyp progreske jetti – Azııa damý bankiniń prezıdenti
Tsıfrlyq baılanys – zamanaýı ekonomıkanyń damýyna yqpal etetin mańyzdy faktorlardyń biri bolyp otyr. Búgingi tańda tsıfrlyq tehnologııanyń arqasynda adamdar qashyqtan jumys isteı alady, balalar úıden oqı alady, úıden shyqpaı-aq dárigerden keńes alýǵa bolady. Degenmen, qazir tsıfrlyq tehnologııalarǵa qoljetimdilik ınterneti barlar men joqtar arasyn alshaqtatyp, bólip jiberdi
, - dedi Masatsýgý Asakava Astana halyqaralyq forýmynda.
ADB prezıdenti Qazaqstannyń tsıfrlandyrýda ǵajaıyp progreske jetkenin, aımaqta ınternettiń ený kórsetkishteri eń joǵary ekenin atap ótti. Oǵan ınternetke qosylýdyń salystyrmaly túrde tómen quny jáne tsıfrlyq saýattylyqtyń joǵarylaýy negizgi faktor bolǵan.
Internettiń enýiniń joǵary deńgeıi Úkimetke memlekettik qyzmetterdiń kópshiligin tsıfrlandyrýǵa múmkindik berdi jáne 2025 jylǵa qaraı memlekettik qyzmetterdiń 100 paıyzyn e-úkimet mobıldik qosymshasymen qamtý josparlanǵanyna óte qýanyshtymyz. Qazaqstan osy progreske súıene otyryp, ekonomıka salasyn tsıfrlyq transformatsııalaý úshin tehnologııany paıdalanýdy keńeıtý, tsıfrlyq ekonomıkany damytýdaǵy serpilis jáne aldaǵy tórtinshi ónerkásiptik revolıýtsııaǵa daıyndyq jumystaryn jalǵastyra alady
, - dedi spıker.
Sonymen birge M. Asakava ónerkásip sektorlaryndaǵy tsıfrlyq transformatsııa jumys oryndaryn qurýdy jáne eńbek ónimdiligin arttyrýdy qamtamasyz etetinin, elektrondyq kommertsııa men saýdanyń artýyn yntalandyratynyn aıtty.
Degenmen, munda múmkindikter de, syn-qaterler de bar. 2021 jyly Qazaqstandaǵy ınnovatsııanyń jaı-kúıine júrgizgen zertteýimiz qyzyqty sátterdi anyqtady.
Birinshiden, tutastaı alǵanda kásiporyndardy tsıfrlandyrý protsesine basshylyqty qamtamasyz etýde Úkimetke sheshýshi ról beriledi. Meniń bilýimshe, qazir 4 mınıstrlik elektr, sý jáne jylytý úshin aqyldy eseptegishterdi engizýde. Osyny eskere otyryp, ulttyq standarttar ázirlenip jatqan kezde «aqyldy» eseptegishterdi standarttaýdy úılestirý múmkindigi bar.
Taǵy bir mindet – energetıkalyq sektorda tsıfrlyq tehnologııalardy qoldanýdy keńeıtýge jáne Úkimettiń elektr jelilerindegi qýat shyǵynyn azaıtýǵa kúsh salýyna jáne 2060 jylǵa deıingi dekarbonızatsııa strategııasynyń órshil maqsattaryna jetýge qatysty. Eger ıntellektýaldy jáne energetıkalyq júıeni, bylaısha aıtqanda «aqyldy» elektr jelilerin qurýda kóshbasshylyq kórsetilmese joǵaryda atalǵan maqsattarǵa qater tónýi yqtımal
, - dedi Masatsýgý Asakava.
Sonymen birge, spıker Qazaqstannyń básekege qabiletti, ártaraptandyrylǵan, ǵylymmen qamtylǵan ekonomıkaǵa kóshýin qoldaý úshin ǵylymı zertteýler men ázirlemelerge járdemdesýde Úkimettiń sheshýshi ról atqaratynyn jetkizdi. Buǵan ǵylymı-zertteý jáne tájirıbelik-konstrýktorlyq jumystarǵa bólinetin bıýdjettiń turaqty ósýi yqpal etedi.
Azııa damý banki Qazaqstannyń damý salasyndaǵy senimdi seriktesi retinde ınnovatsııalardy engizýge yqpal etetin jaǵdaıdy odan ári jaqsartý boıynsha jumys isteýge daıyn. Osylaısha biz Qazaqstanǵa tsıfrlyq alshaqtyqty qysqartýǵa, ekonomıkalyq damý jolynda keıbir kedergilerdi belgileýge jáne eshkimniń artta qalmaýyn qamtamasyz etýge kómektesemiz
, - dedi ol.
Aıta keteıik, búgin Astana halyqaralyq forýmy jumysyn bastady. Forým klımattyń ózgerýine, azyq-túlik tapshylyǵyna jáne energetıkalyq qaýipsizdikke qatysty máselelerdi sheshý joldaryn qarastyrý maqsatynda shetel úkimetteriniń, halyqaralyq uıymdardyń, bıznes pen ǵylymı ortanyń joǵary laýazymdy delegattarynyń dıalogine arnalǵan alań bolmaq.
