Qazaqstan Chernogorııany senimdi seriktes retinde qarastyryp otyr – Qasym-Jomart Toqaev
ASTANA. KAZINFORM — Qazaqstan men Chernogorııa arasynda ekijaqty yntymaqtastyq turaqty damyp keledi. Bul týraly Chernogorııa Prezıdenti ıAkov Mılatovıchpen keńeıtilgen quramdaǵy kelissóz barysynda Memleket basshysy Qasym-Jomart Toqaev málim etti.
Memleket basshysy Chernogorııa Prezıdentiniń osy sapary elder arasyndaǵy dıplomatııalyq qarym-qatynastyń 20 jyldyǵy aıasynda ótip jatqany erekshe mánge ıe ekenin aıtty.
Sonymen qatar Qasym-Jomart Toqaev búgingi shaǵyn quramdaǵy kelissóz barysynda ekijaqty yntymaqtastyqty odan ári damytýǵa ortaq ustanym rastalǵanyn sóz etti.
Eki eldiń resmı delegatsııa músheleriniń qatysýymen jalǵasqan kelissózder barysynda saıası, saýda-ekonomıkalyq jáne mádenı-gýmanıtarlyq yntymaqtastyq perspektıvasy talqylandy.
Memleket basshysy Chernogorııany Qazaqstannyń Balqan túbegindegi senimdi seriktesteriniń biri retinde atady. Sonymen qatar el basshylyǵynyń Eýropa Odaǵyna múshe bolýdy kózdegen syndarly ári dáıekti saıasatyna joǵary baǵa berdi.
– Prezıdent myrza, Siz reformalardy ilgeriletip, Eýropa Odaǵy músheligine úmitker sanalatyn Chernogorııanyń pozıtsııasyn nyǵaıtýda mańyzdy ról atqaryp kelesiz. Osy ulttyq strategııalyq maqsatqa jetý jolynda tabys tileımiz, – dedi Qasym-Jomart Toqaev.
Budan buryn habarlanǵandaı, Qasym-Jomart Toqaev Táýelsizdik saraıynda Chernogorııa Prezıdentin qarsy aldy.
