Qazaqstan Chernogorııaǵa reıster sanyn arttyrýdy kózdep otyr

ASTANA. KAZINFORM — Qazaqstan men Chernogorııa arasyndaǵy áýe qatynasyn keńeıtý, reıster jıiligin arttyrý jáne jańa áýe tasymaldaýshylaryn tartý máseleleri talqylandy. Bul týraly Monrealda ótken IKAO konferentsııasy aıasyndaǵy eki eldiń avıatsııa ókilderiniń kezdesýinde aıtyldy. Bul týraly Azamattyq avıatsııa komıteti málim etti.

Qazaqstan Chernogorııaǵa reıster sanyn arttyrýdy kózdep otyr
Foto: Kazinform\JI

Monreal qalasynda ótip jatqan IKAO-nyń 7-shi Dúnıejúzilik áýe kóligi konferentsııasy aıasynda QR KM Azamattyq avıatsııa komıtetiniń tóraǵasy Saltanat Tompıeva men Chernogorııanyń Azamattyq avıatsııa agenttiginiń dırektory Ivan Shchekıch kezdesti. 

Qazaqstan Chernogorııaǵa reıster sanyn arttyrýdy kózdep otyr
Foto: Azamattyq avıatsııa komıteti

— Taraptar azamattyq avıatsııa salasyndaǵy Qazaqstan men Chernogorııa arasyndaǵy yntymaqtastyqty damytý perspektıvalaryn, eki el arasyndaǵy áýe qatynasyn keńeıtý jáne avıatsııalyq bılik oryndarynyń ózara is-qımyldy nyǵaıtý máselelerin talqylady.  Qazaqstan tarapy Chernogorııamen áýe qatynasyn odan ári damytýǵa, reıster jıiligin arttyrý men qosymsha áýe tasymaldaýshylardy tartýdy qosa alǵanda, áýe qatynasyn keńeıtýge múddelilik tanytty, — delingen habarlamada.

Qazirgi ýaqytta Air Astana áýe kompanııasy jazǵy kezeńde Almaty — Podgorıtsa jáne Astana — Podgorıtsa baǵyttary boıynsha reıster oryndaıdy. 

Saltanat Tompıeva elimizdiń 17 áýejaıynda qoldanystaǵy «ashyq aspan» rejımi týraly baıandady. Bul rejım reıster sany boıynsha shekteýlerdi alyp tastaýdy jáne sheteldik áýe kompanııalaryna áýe keńistigi erkindiginiń besinshi dárejesin berýdi kózdeıdi. 

Kezdesý qorytyndysy boıynsha taraptar syndarly ózara is-qımyldy qoldaýǵa jáne eki el arasyndaǵy áýe qatynasyn odan ári damytý perspektıvalaryn zerdeleýge ózara múddelilikterin rastady.

Aıta keteıik, Qazaqstanda toǵyz aıda 24 jańa halyqaralyq áýe baǵyty ashyldy.