Qazaqstan chempıonatynyń úzdik fýtbolshylary anyqtaldy
NUR-SULTAN.QazAqparat – Qazaqstan Kásipqoı fýtbol lıgasy 2020 jylǵy maýsymnyń qorytyndysy boıynsha Olimpbet-Qazaqstan chempıonatynyń úzdikter quramasyn jarııalady, dep habarlaıdy QazAqparat.
Qazaqstan Kásipqoı fýtbol lıgasynyń (QKFL) resmı saıtynda bıylǵy fýtbol maýsymynyń úzdikter quramy jarııalandy. Úzdik komanda QKFL seriktesi InStat kompanııasynyń matchtaryn statıstıkalyq taldaý negizinde quryldy. Sonymen 2020 jyldyń úzdikter quramasy tómendegideı:
Qaqpashy: Aleksandr Mokı («Tobyl»).
Tájirıbeli qaqpashy 13 matchtyń 10-ynda qaqpasyna gol ótkizbegen. Mokın 23 soqqyny qaıtardy. Іs-qımyl ındeksi – 240.
Oń qaptaldaǵy qorǵaýshy: Іlııas Ámirseıitov («Qaısar»).
Bıylǵy maýsym «Qaısardyń» qorǵaýshysy úshin sátti boldy. Ol qorǵaýshylardyń TOP-5 sanatyna endi. Statıstıka boıynsha 49 ret dopqa talasta qarsylastarynan basym túsken.
Ortalyq qorǵaýshylar: Rade Dýgalıch jáne Nuraly Álip («Qaırat»).
Dýgalıch–Álip juby chempıonatta eń tıimdi óner kórsetkenderdiń qatarynda. Oıynshylar bir-birin tolyqtyryp, múmkindiginshe senimdi áreket etti. Rade dopqa talastarda ozyq shyqsa, jas qorǵaýshy Nuraly ár oıynda saýatty qımyldady. Sonymen qatar Nuraly tórt ret gol soqty. Ulttyq quramanyń beldi oıynshysy sanalady.
Sol qaptaldaǵy qorǵaýshy: Ǵafýrjan Súıimbaev («Qaırat»).
Súıimbaev qorǵanysta da, shabýylda da ózin kórsete bildi. Chempıonatta 7 golǵa múmkindik jasady. Ol maýsym boıy úzdikter quramyna 8 ret kirgen. Іs-qımyl ındeksi – 265.
Tirek jartylaı qorǵaýshy: Djaba Kankava («Tobyl»).
«Tobyldyń» grýzııalyq fýtbolshysy Djaba Kankava kezekti maýsymda sátti oınady. Djaba ózi qatysqan jekpe-jektiń 62% -ynda jeńdi jáne osy kórsetkish boıynsha úzdik 3 oıynshynyń qatarynda.
Oń jaq jartylaı qorǵaýshy: Tıgran Barsegıan («Astana»).
Armenııalyq oıynshy Barsegıan shabýyl shebinde elordalyq komandany alǵa súıredi. Joǵary jeke sheberlik pen tıimdi drıblıng onyń aınymas serigi boldy. Tıgran úsh gol soǵyp, áriptesterine 5 goldyq pas berdi.
Shabýyldaýshy jartylaı qorǵaýshy: Ashat Taǵybergen («Qaısar»).
Taǵybergen Qyzylorda klýbynyń shabýyldarynyń negizgi uıymdastyrýshysy ǵana emes, qorǵanysta da jaqsy oınady. Ashat 2020 jyly 4 gol soǵyp, 2 ret assıstent atandy. Onyń eki goly tamyz jáne qarasha aılaryndaǵy eń úzdik gol bolyp tanyldy.
Sol jaq jartylaı qorǵaýshy: Joao Paýlo («Ordabasy»).
Joao – chempıonattyń úzdik oryndaýshylarynyń biri. Shymkenttik klýbtyń shabýylyndaǵy basty róldi osy brazılııalyq fýtbolshy oınady. Barlyǵy 12 gol soǵyp, týrnırdiń úzdik bombardıri atandy. Sonymen qatar Paýlo birneshe statıstıkalyq kórsetkishter boıynsha Lıgada úzdik atandy. Іs-qımyl ındeksi – 248.
Shabýylshylar: Abat Aıymbetov jáne Vagner Lav («Qaırat»).
Aıymbetov ekinshi maýsym qatarynan eń nátıjeli qazaqstandyq shabýylshy atandy. 20 matchta ol 10 gol soqty. Abat jańa ujymǵa bıyl qosylsa da, oıyn shemasynda ózin jaqsy kórsetti.
Vagner Lav Olimpbet-Qazaqstan chempıonatynyń naǵyz sánine aınaldy. Juldyzdy brazılııalyq jeke sheberligi jaǵynan lıgadaǵy eń úzdikterdiń biri boldy. Ol «Qaırattyń» 17 nátıjeli shabýylyna qatysty. Statıstıkalyq málimetterge sáıkes, Lavtyń qorjynynda 4 gol, 12 nátıjeli pas jáne 17 dál soqqy bar. Іs-qımyl ındeksi – 266.
