Qazaqstan chempıonatynyń sáýir aıyndaǵy úzdik fýtbolshysy anyqtaldy
QOSTANAI. QazAqparat - Qazaqstan Kásipqoı fýtbol lıgasy (QKFL) sáýir aıynyń qorytyndysy boıynsha Qazaqstan chempıonatynyń eń úzdik oıynshysy men jattyqtyrýshysyn tańdady, dep habarlaıdy QazAqparat.
Bul saýalnamaǵa premer-lıga komandalary bas bapkerleri qatysty. Úzdikterdi anyqtaý barysynda saýalnamaǵa qatysýshy óziniń úsh oıynshydan turatyn tizimin atady. Alǵan orynǵa baılanysty oıynshylarǵa upaılar tómendegideı berildi: 1 oryn - 3 upaı, 2 oryn - 2, 3 oryn - 1 upaı. Upaılardy qosý arqasynda qorytyndy shyǵaryldy. Úzdik bapkerdi anyqtaý barysynda saýalnamaǵa qatysýshylar bir ǵana úmitkerdi atady.
Saýalnama nátıjeleri boıynsha sáýir aıynyń eń úzdik oıynshysy bolyp «Astananyń» fýtbolshysy Dorın Rotarıý tanyldy. Ol qostanaılyq «Tobyldyń» kapıtany Azat Nurǵalıevten eki upaıǵa basym tústi.
Al eń úzdik bas bapkerge beriletin syılyq ta elordalyq Roman Grıgorchýkke buıyrdy.
