Qazaqstan chempıonatynda jeńiske jetken boksshy Álem chempıonatynda el namysyn qorǵaıdy
ASTANA. QazAqparat - Qazaqstan chempıonatynda jeńiske jetken boksshy Azııa jáne Álem chempıonattarynda el namysyn qorǵaıdy, dep habarlaıdy QazAqparat.
Qazaqstan boks federatsııanyń aqparatyna qaraǵanda, búgin Qazaqstan boks federatsııasy bapkerler keńesiniń jıyny ótken. Jıyn barysynda bokstan memlekettik jattyqtyrýshy Bolat Ábdirahmanov Pavlodarda ótetin Qazaqstan chempıonatynyń jeńimpazdary halyqaralyq jarystarda el namysyn qorǵaıtyndyǵyn aıtqan.
«Taıaýda (20-27 qarashada) Pavlodarda ótetin chempıonattyń qorytyndysy boıynsha biz halyqaralyq týrnırlerge baratyn sportshylardy irikteımiz. Básekelestik bolýy úshin qurama komandanyń 3 sapyn jasaqtaımyz. Osy chempıonatta kóshbasshy joq salmaq sanattarynda jeńiske jetkender Azııa chempıonatyna, aldaǵy ýaqytta Gambýrgte ótetin álem chempıonatyna baratyn bolady. Bapkerler keńesi dene shynyqtyrý jáne taktıkalyq daıyndyqqa basa mán berýge sheshim qabyldady», - dedi Ábdirahmanov.
Federatsııanyń habarlaýynsha, qyzdar boksyna da basa nazar aýdarylatyn bolady. Óıtkeni, aldaǵy Tokıo Olımpıadasynda qyzdar boksyndaǵy 3 salmaq sanatyna taǵy ekeýi qosylady. Sondyqtan elimizde ótetin barlyq mańyzdy jarystarǵa mindetti túrde qyzdar arasyndaǵy jekpe-jekter qosylady.
