Qazaqstan chempıonatynda qostanaılyqtar top jardy
QOSTANAI. QazAqparat - Qaraǵandy qalasyndaǵy shaǵyn fýtboldan múmkindigi shekteýli jandar arasyndaǵy chempıonat aıaqtaldy. Eldiń ár óńirinen kelgen aýqymdy týrnırde Qostanaı oblysynyń quramasy jeńiske jetti, dep habarlaıdy QazAqparat tilshisi.
Bul komanda Qostanaı oblysy ákimdigi bilim basqarmasynyń «Erekshe bilim berilýine qajettiligi bar balalarǵa arnalǵan № 3 Qostanaı arnaıy mektep-ınternaty» janynan qurylǵan. Komandanyń bas bapkeri Ivan Grıtsenkonyń aıtýynsha, balǵyndar jarysqa eki aı buryn daıyndalǵan.
«Oblysta qamkóńil jandardy salaýatty ómir saltyn qalyptastyrýǵa shaqyryp, olardyń qabiletine qaraı sport túrlerimen aınalysýyna jaǵdaı jasalǵan. Osylaısha, múmkindigi shekteýli jandar qandaı da bir kásip taýyp, aldaryna maqsat-múdde qoıady. Balǵyndardyń ár jeńisten keıingi qýanyshyn kórýdiń ózi bólek áńgime. Bir qýanyshtysy, olar jattyǵý zalyna keshikpeı kelip, berilgen tapsyrmaǵa yqtııatty qaraıdy. Osy estý qabileti tómen sportshylardyń arasynda ótken týrnırdegi jeńistiń basty sebebi osy shyǵar», - deıdi bas bapker.
Chempıonatqa Qazaqstannyń barlyq oblystarynan iriktelgen on úsh qurama qatysty. Dop dodasyna túskenderdiń arasyndaǵy eń jas komanda - Qostanaı oblysy. Olar buǵan deıin Qyrǵyzstanda ótken shaǵyn fýtbol jarysynan oljaly oralǵan-dy. Qostanaılyqtar óz tobynda Qaraǵandy, Almaty, Qyzylorda komandalarymen kúsh synasty. Alǵashqy oıynda Almaty jastaryn 4:2 esebimen utty. Al ekinshi kezdesýde alań ıelerine dál osyndaı eseppen jol berdi. Qorytyndy matchta qyzylordalyq ujymnyń qaqpasyna segiz dop soqty. Sóıtip, úzdikti anyqtaý úshin Qostanaı oblysy men ózge toptan ozyq shyqqan Ekibastuz qalasynyń komandalary kezdesti. Fınalda 6:3 esebimen jeńgen jerlester týrnırdiń jeńimpazy atandy. Ekibastuzdyqtarǵa qarsy belsendi óner kórsetken Rýslan Shyńǵysbek jarystyń eń úzdik oıynshysyna beriletin syılyqqa ıe boldy. Bas bapker Tımýr Esov, Adreı Danın, Nıkolaı Prıvalov, Rústem Muratbaev sııaqty oıynshylardyń bilikti mamandardyń joǵary baǵasyn alǵanyn aıtty.
«Jigeri jasymaǵan jandardyń aldaǵy ýaqytta da tolaıym tabystarǵa jetetine senimim mol. Sondyqtan bapker retinde qoldan kelgenniń bárin jasaımyn, olardyń sheberlikterin shyńdaı berýdi jalǵastyra beremiz. Memleket basshysy halyqtyń otyz paıyzyn buqaralyq sportqa tartý kerektigi jaıly da udaıy aıtyp keledi emes pe? Endeshe, bizdiń aldymyzda úlken maqsattar tur»,- dedi Ivan Grıtsenko.
Osy chempıonatta nátıjeli oınaǵan qostanaılyq bes fýtbolshy Qazaqstannyń shaǵyn fýtbol qurama komandasyna shaqyrtý aldy.
