Qazaqstan chempıonatynda «Aqjaıyq» «Kaspııdi» 2:0 esebimen jeńdi

ORAL. QazAqparat – Fýtboldan Qazaqstan chempıonatynyń 13-týrynda Oraldyń «Aqjaıyǵy» óz alańynda Aqtaýdyń «Kaspııin» qabyldady, dep habarlaıdy QazAqparat tilshisi.

Týrnır kestesinde aqtaýlyqtar 22 upaımen jetinshi satyda tursa, oraldyqtardyń jaǵdaıy máz emes-ti. Nebári 12 upaı jınaǵan «Aqjaıyq» 13-orynda, ıaǵnı kósh sońynda edi.

Chempıonat barysyndaǵy úziliste Qazaqstan kýbogy oıyndaryn «Aqjaıyq» birshama sátti ótkizip, shırek fınalǵa joldama aldy. Komanda tizginin moldovalyq maman Igor Pıkýşak ustap, birqatar jańa oıynshylar qosyldy. Sonyń ishinde belorýssııalyq Rodıon Sıamýk alǵash ret qaqpaǵa turdy.

Birinshi taımda alań ıeleri «Kaspıı» qaqpasyna kóbirek qaýip tóndirgenimen, esep ashylǵan joq.

Ekinshi kezeńde 74-mınýtta «Aqjaıyq» sapyndaǵy grýzııalyq shabýylshy Toma Tabatadzeden pas alǵan, oıynǵa tyńnan qosylǵan armenııalyq Zaven Badoıannyń qaıshylaı tepken doby qaqpadan bir shyqty – 1:0. Arada eki mınýt ótkende, taǵy da T. Tabatadzeniń pasynan keıin oraldyqtar quramyna búgin alynǵan armenııalyq jartylaı qorǵaýshy Petros Avetısıan esepti 2:0-ge jetkizdi.

Osylaısha, el birinshiliginde kópten beri jeńis dámin sezinbegen «Aqjaıyq» upaı qoryn tolyqtyrdy.

Eske sala keteıik, budan buryn «Aqjaıyqtyń» Qazaqstan kýbogynyń shırek fınalyna joldama alǵanyn jazǵan bolatynbyz.

Sondaı-aq, búgin fýtboldan premer-lıga komandalary arasynda el birinshiliginiń 13-týry bastalatyny habarlandy.

Sýretterdi túsirgen Aıbatyr NURASh