Qazaqstan ChatGPT Edu engizgen alǵashqy elderdiń biri atandy
ASTANA. KAZINFORM – Qazaqstan 2026 jyly bilim berý júıesi aıasynda ChatGPT Edu platformasyn engizýge kirisken álemdegi alǵashqy elderdiń biri boldy. Bul týraly Ǵylym jáne joǵary bilim vıtse-mınıstri Dınara Şeglova Ortalyq kommýnıkatsııalar qyzmetinde ótken baspasóz máslıhatynda aıtty.
Onyń sózinshe, elimiz joǵary bilim berý salasyna álemdik ozyq tájirıbelerdi kezeń-kezeńimen engizip keledi. Qazir OpenAI, NVIDIA, Google, Huawei, Coursera jáne ETS uıymdarymen birlesken jobalar júzege asyrylyp jatyr.
Vıtse-mınıstr halyqaralyq deńgeıdegi iri bastamalardyń biri retinde Coursera Business to Nation jobasyn atady. Búginde jobaǵa elimizdiń 100 joǵary oqý orny men 255 myńnan astam stýdent qatysyp otyr.
Joba aıasynda stýdentter 5 mıllıon saǵattan astam bilim alyp, 554 myńnan astam halyqaralyq sertıfıkat ıelengen. Onyń ishinde 109 myńnan astamy jasandy ıntellekt baǵyty boıynsha berilgen.
— Qazaqstan Coursera tarapynan bilim berýdi tsıfrlyq turǵydan jańǵyrtýda kóshbasshy elderdiń biri retinde halyqaralyq deńgeıde moıyndaldy, — dedi Dınara Şeglova.
Onyń aıtýynsha, ChatGPT Edu platformasyn engizý bilim berý protsesine zamanaýı tehnologııalardy keńinen qoldanýǵa jáne stýdentterdiń tsıfrlyq daǵdylaryn damytýǵa múmkindik beredi.
Aıta keteıik, osyǵan deıin Qazaqstannyń barlyq joǵary oqý ornynda mamandyǵyna qaramastan stýdentterge jasandy ıntellekt páni oqytylatyny habarlanǵan edi.
