Qazaqstan biz oılaǵannan da joǵary damyǵan el eken - koreıalyq balýan qyz
ASTANA. KAZINFORM - 5-shi Dúnıejúzilik kóshpendiler oıyndaryna kelgen koreıalyq balýan qyz O Djı Hen ózin Qazaqstan qatty tańǵaldyrǵanyn aıtyp berdi.
«Men ómirimde alǵash ret Qazaqstanǵa kelip turmyn. Dúnıejúzilik kóshpendiler oıyny aıasynda birinshi ret qazaq kúresinen baǵymdy synadym. Bul men úshin umytylmas sátter bolyp qalary anyq. Óz elimde Koreı kúresimen aınalysamyn. Al qazaq elinde alǵash ret qazaq kúresinen baǵymdy synap kórdim. Ókinishke qaraı, birinshi beldesýimde jeńilis taptym. Biraq, utylyp qalsam da ózimdik tájirıbe aldym dep oılaımyn. Qazaq kúresiniń qandaı kúres ekenin kórdim, túsindim. Osyǵan deıin erejelerin, ádis jasaý qaǵıdalaryn vıdeolardan qarap, óz betimshe úırengen edim. Mine, búgin óz kózimmen kórdim», - dedi balýan qyz.
Sonymen qatar, Qazaqstan ózi oılaǵannan da damyǵan el ekenin kórip, qatty tańǵalǵanyn atap ótti.
«Men Qazaqstandy halqy az, shaǵyn, asa bir damymaǵan el eken dep oıladym. Kelgende bári basqasha kórindi. Qazaq eli biz oılaǵan deńgeıden áldeqaıda damyp ketken el ekenin kórip qatty tańǵaldym. Astanalaryńyz qandaı ádemi. Halyqtaryńyz qandaı qonaqjaı! Maǵan bári-bári qatty unady. Kóshpendiler oıynyn da óte joǵary deńgeıde uıymdastyryp jatqandaryńyz kórinip tur. Men buıyrsa, qazaq kúresin tolyq meńgerip, taǵy da elderińizge jarysqa kelgim keledi», - dedi koreıalyq balýan O Djı Hen.
Esterińizge sala keteıik, búgin V Dúnıejúzilik Kóshpendiler oıyndarynyń úshinshi kúni óz máresine jetti. Qazaqstan quramasy ázirge 21 altyn, 10 kúmis, 17 qola (48) medalmen jalpy esepte kósh bastap keledi.
