Qazaqstan bıýdjettiń ashyqtyǵy boıynsha álemdik reıtıngte joǵary kóterildi

ASTANA. QazAqparat - 2017 jyldyń qorytyndysy boıynsha Qazaqstan Bıýdjettiń ashyqtyǵy jóninen álemdik zertteýde 100 upaıdan 53 upaı jınady, dep habarlaıdy QazAqparat tilshisi.

Zertteý jumystaryn Halyqaralyq bıýdjet seriktestigi 109 kórsetkish boıynsha álemniń 115 memleketinde júrgizgen.

Qazaqstan boıynsha zertteý júrgizgen «SANDJ» zertteý ortalyǵynyń dırektory Janar Jandosova Qazaqstannyń sońǵy eki jylda bıýdjettik aqparatqa qoljetimdilikti jaqsartqanyn atap ótti. 2015 jyly atalǵan reıtıng boıynsha Qazaqstan 51 upaıǵa ıe bolsa, 2017 jyly - 53 upaı jınaǵan.

«Jalpy álemdik derekterge súıensek, bıýdjettiń ashyqtyq ındeksi ósip keledi. Bıyl reıtıng nátıjesi boıynsha irgeles kórshilerimiz Reseı - 72 upaı, Túrkııa - 58, Qyrǵyzstan - 55 jáne Grýzııa - 82 upaı jınap otyr. Qazaqstan 53 upaımen Gondýras jáne Nepal elderiniń arasynda tur», - dedi Janar Jandosova Astanada ótken baspasóz máslıhatynda.

2017 jyly Qazaqstannyń Bıýdjet jobasynyń tolyqtyǵy boıynsha kórsetkishi - 52 upaıǵa, ishki jyldyq esep - 89 upaıǵa, jyldyń esep kórsetkishi - 64 upaıǵa deıin artqan. Jarty jyldyq esep kórsetkishi boıynsha Qazaqstan 37 upaımen baǵalansa, azamattyq bıýdjet (elde júrgizilmeıdi) jáne áleýmettik-ekonomıkalyq damý boljamy (aqparat tym kesh jarııalanǵan) boıynsha múldem upaı almaǵan.

Bıýdjettik protsessterge qoǵamnyń qatysýy reıtınginde Qazaqstan 100 upaıdyń 13-ine ǵana ıe boldy. Bıýdjet shyǵystaryn zańnamalyq bılik tarapynan qadaǵalaý boıynsha - 63 upaı jınady.

Qazaqstan postkeńestik elder arasynda Qyrǵyzstannan (55 upaı), Reseıden (72 upaı), Ýkraına (54 upaı) jáne Grýzııadan (82 upaı) tómen tur.

Bıýdjet týraly tolyqqandy aqparat bergen Jańa Zelandııa (89 upaı), Ońtústik Afrıka (89), Shvetsııa (87), Norvegııa (85), Grýzııa (82) elderi reıtıngte alǵashqy bestikti qurady. Al jetkilikti aqparat bermeıtin Iemen, Katar, Lesoto, Venesýela, Nıgerııa sońǵy qatardan kórindi.