Qazaqstan byltyr 29,3 mln tonna kómir eksporttaǵan

NUR-SULTAN. QazAqparat – Eldegi kómir óndirýshi kompanııalar 4 aıdyń ishinde 36,5 mln tonna kómir óndirgen, dep habarlaıdy QazAqparat tilshisi.

Bul týraly Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda aıtty.

«Ótken jylytý maýsymynyń qorytyndysy boıynsha kómirdi tutyný kólemi shamamen 10 mln tonna boldy. Onyń ishinde kommýnaldyq-turmystyq sektorǵa 2,8 mln tonna, halyqqa 7,2 mln tonna baǵyttaldy. Kómirmen qamtamasyz etý kólemi 100% qurady», - degen mınıstr aldaǵy maýsymǵa qajet otyn mólsherin ákimdikter 1 shildege deıin usynýy qajet ekenin eskertti.

«2020 jyly jospar boıynsha (kómir kontsentratyn eseptemegende) 107,2 mln tonna kómir óndirildi. Eldiń ishki naryǵynda energııa óndirýshi kásiporyndarǵa 58,8 mln tonna kómir tıeldi. Bul 2019 jylmen salystyrǵanda 2,6% artyq (57,3 mln. tonna). Ónerkásip kásiporyndaryna 5,6 mln tonna kómir baǵyttaldy. Kommýnaldyq-turmystyq qajettilikterge jáne halyqqa dep 10,6 mln tonna kómir tıeldi. Kómir eksporty shamamen 29,3 mln. tonna kómirdi qurady. Jalpy alǵanda, aldaǵy jylý berý maýsymyna daıyndyq jumystary belsendi júrgizilip jatyr. Kómir tapshylyǵy bolmaýy tıis», - dedi Beıbit Atamqulov.