Qazaqstan búırek pen uıqy bezine transplantatsııa jasaıtyn álemdegi tórtinshi el atandy
ASTANA. 13 qyrkúıek. QazAqparat - Qazaqstanda alǵash ret búırek pen uıqy bezin birge almastyrý otasy jasaldy.
Osylaısha, Qazaqstan mundaı kúrdeli ota jasalatyn álemdegi tórtinshi el atandy. Bul týraly Densaýlyq saqtaý mınıstrliginiń baspasóz qyzmetinen habarlandy.
«2012 jylǵy 12 qyrkúıekte Almatydaǵy №7 qalalyq klınıkalyq aýrýhanada tuńǵysh ret bir ýaqytta búırek pen uıqy bezin transplantatsııalaý otasy jasaldy. Bul operatsııanyń ereksheligi sol, Qazaqstan mundaı kúrdeli ota jasaǵan dúnıejúzindegi tórtinshi memleket atanyp otyr. Buǵan deıin medıtsınadaǵy mundaı úlken jetistikke AQSh, Ońtústik Koreıa jáne ótken jyly Italııa ǵana qol jetkizgen edi», - delingen baspasóz qyzmeti taratqan habarlamada.
Mınıstrliktiń habarlaýynsha, operatsııany otandyq dárigerler Ońtústik Koreıadan shaqyrylǵan professor Kvon Te Paktyń qatysýymen jasaǵan. Jalpy, ota 10 dárigerdiń kúshimen atqarylyp shyqty. Bir ýaqytta eki birdeı operatsııa zalynda qatar júrip, birinde laparoskopııalyq ádispen organdar, aldymen búırek, sosyn uıqy bezi alynǵan. Al ekinshi zalda organdardy naýqasqa salý sharasy júrgizilgen. Sonymen qatar, jeke ústelde mamandar organdardyń ózin daıyndaýmen de aınalysypty.
Osylaısha 16 jasynan beri qant dıabeti dertine shaldyǵyp, ótken jyldan bastap búırek jetispeýshiligine dýshar bolǵan 28 jastaǵy naýqasqa alǵashqy kúrdeli ota jasalǵan. Oǵan donor bolýǵa 24 jastaǵy inisi kelisken. Doktor Kvan Te Pak qazaqstandyq mamandar mundaı biregeı otalardy ózderi de jasaýǵa daıyn ekenin atap kórsetti. Koreıalyq dáriger «Bizdiń Ońtústik Koreıada mundaı operatsııalar ádette, 8 saǵatqa sozylady. Al Qazaqstanda nebári 6 saǵattyń ishinde atqaryp shyqtyq. Bul árıne, klınıkanyń jaqsy jaraqtandyrylǵany arqasynda múmkin boldy. Munda kúrdeli ota jasaýǵa qajettiń barlyǵy bar jáne qazaqstandyq áriptesterimniń kásibı sheberlegin erekshe aıtym keledi» dedi ol.
Bolashaqta ınnovatsııalyq emdeý ádisterin engizý úshin osyndaı sheberlik-klastaryn ótkizý, jyldyń sońyna deıin Almatydaǵy №7 qalalyq klınıkalyq aýrýhanada baýyr transplantatsııasyn jasaý josparlanyp otyr. Alǵan qoıǵan maqsattardy iske asyrý organdardy transplantatsııa jasaý úshin shetelderge baratyn azamattar sanyn qysqartý arqyly bıýdjet qarjysyn eleýli túrde únemdeýge múmkindik bermek.
