Qazaqstan BUU sessııasynda zorlyq-zombylyqtyń aldyn alý tájirıbesin tanystyrdy
ASTANA.KAZINFORM - Jenevada ótken BUU Adam quqyqtary jónindegi keńesiniń 62-sessııasynda Qazaqstan áıelder men qyzdarǵa qatysty turmystyq zorlyq-zombylyqtyń aldyn alý jáne oǵan qarsy is-qımyl baǵytyndaǵy tájirıbesin tanystyrdy. Bul týraly Mádenıet jáne aqparat mınıstrligi habarlady.
Bul halyqaralyq jıynǵa qatysý elimizdiń adam quqyqtaryn qorǵaý jáne turmystyq zorlyq-zombylyqtyń aldyn alý baǵytyndaǵy ustanymyn aıqyndaı tústi.
Taqyryptyq sessııa barysynda Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa áıelder men balalardy qorǵaý baǵytynda júzege asyrylyp jatqan keshendi sharalardy tanystyrdy.
Jıynda ınstıtýtsıonaldyq jáne zańnamalyq reformalar keńinen talqylandy. Atap aıtqanda, Memleket basshysynyń tapsyrmasymen 2025 jyly Ortalyq Azııada alǵash ret ishki ister organdarynyń turmystyq zorlyq-zombylyqqa qarsy is-qımyl jónindegi mamandandyrylǵan bólimshesi quryldy. Sondaı-aq stalkıng pen qyz alyp qashqany úshin qylmystyq jaýapkershilikti kózdeıtin zańnamalyq ózgerister tanystyryldy.
Otbasylardy qoldaý júıesin damytý máselesi de nazardan tys qalǵan joq. Búginde elimizdiń barlyq óńirinde quqyqtyq, psıhologııalyq jáne áleýmettik kómek kórsetetin 158 Otbasyn qoldaý ortalyǵy jumys isteıdi.
Sonymen qatar ortalyqtardyń negizgi mindetteriniń biri – qıyn ómirlik jaǵdaıǵa tap bolǵan otbasylarǵa qoldaý kórsetip, turmystyq zorlyq-zombylyqtyń aldyn alý sharalaryn júzege asyrý. Budan bólek, 2026 jylǵy sáýirden bastap Almaty qalasynda iske asyrylyp jatqan «Agressorlarmen jumys jónindegi ınterventsııalyq ortalyq» qanatqaqty jobasy tanystyryldy.
BUU Adam quqyqtary jónindegi keńesiniń alańynda usynylǵan tájirıbe Qazaqstannyń zańnamany jetildirý, zorlyq-zombylyqtyń aldyn alý tetikterin damytý jáne zardap shekken azamattarǵa kómek kórsetý baǵytyndaǵy júıeli jumysyn aıǵaqtady.
