Qazaqstan BUU Órkenıetter alıansynyń jahandyq forýmyna qatysty

ASTANA. KAZINFORM – QR Parlamenti Senatynyń depýtaty Darhan Qydyráli BUU Órkenıetter alıansynyń jahandyq XI forýmyna qatysty.

Senator halyqaralyq forým aıasynda Senat tóraǵasy Máýlen Áshimbaevtyń Alıanstyń 20 jyldyǵyna oraı quttyqtaý hatyn BUU Órkenıetter alıansynyń Joǵary ókili Mıgel Anhel Moratınosqa tabystady.

Alıanstyń Joǵary ókili óz kezeginde Qazaqstan Prezıdentiniń tóraǵalyǵymen ótken Álemdik jáne dástúrli dinder kóshbasshylary seziniń mańyzdylyǵyn atap ótip, Senat basshylyǵyna alǵysyn bildirdi.

BUU Bas hatshysy Antonıo Gýterrısh forýmnyń ashylý saltanatynda sóz sóılep, jekkórýshiliktiń taralýyna qarsy turý, ózara toleranttylyqty damytý, jalpyadamzattyq qundylyqtardy nyǵaıtý, mádenı alýandyqty jáne beıbitshilikti saqtaýdyń mańyzdylyǵyn atap ótti.

BUU Órkenıetter alıansy órkenıetter, dinder men halyqtar arasyndaǵy ózara túsinistikti nyǵaıtýda, sondaı-aq beıbitshilik mádenıetin qalyptastyrýda mańyzdy ról atqarady. Uıym qurylǵan sátten bastap Qazaqstannyń Álemdik jáne dástúrli dinder kóshbasshylarynyń Sezin ótkizý jónindegi bastamasyn qoldap keledi. Forým qorytyndysy boıynsha qorytyndy deklaratsııa qabyldandy.

Aıta keteıik, Senat ákimshilik ádilet ınstıtýtyn jetildirýge múmkindik beretin Zańdy maquldady.