Qazaqstan BUU-nyń medıatsııalyq tatýlasý týraly konventsııasyna qol qoıdy

NUR-SULTAN. QazAqparat –QR Ádilet mınıstri Marat Beketaev Qazaqstan Respýblıkasy atynan Birikken Ulttar Uıymynyń medıatsııa nátıjesinde qol jetkizilgen halyqaralyq tatýlasý kelisimderi týraly konventsııasyna qol qoıdy, dep habarlaıdy QazAqparat Ádilet mınıstrliginiń saıtyna silteme jasap.

Konventsııa BUU-nyń halyqaralyq saýda quqyǵy jónindegi komıssııasymen (UNCITRAL) ázirlengen jáne kommertsııalyq daýlardy medıatsııa jolymen retteý týraly kelisimderdi oryndaý úshin halyqaralyq rejimdi engizýge baǵyttalǵan.

Konventsııaǵa qol qoıý rásimine 46 memleket qatysty, olardyń qatarynda Aýstralııa, Qytaı, AQSh, Shveıtsarııa, Ońtústik Koreıa, Japonııa jáne basqa elder bar.

«Postkeńestik keńistiktegi azııalyq aımaqtan Qazaqstan Respýblıkasy Konventsııaǵa qol qoıǵan birinshi memleket bolyp tabylady, bul osy aımaqta Qazaqstan kommertsııalyq daýlardy sheshýdiń damýy protsesinde kóshbasshy ekendiginiń taǵy bir dáleli.

Konventsııa medıatsııa jolymen rettelgen transshekaralyq kelisimderdiń oryndalýyn qamtamasyz etýdi kózdeıdi, sondaı-aq halyqaralyq kommertsııalyq daýlardy retteý jónindegi normatıvtik quqyqtyq bazany nyǵaıtýǵa baǵyttalǵan», - delingen resmı aqparatta.

Osylaısha, Konventsııa sottardy tańdaý jónindegi kelisimder týraly Gaaga Konventsııasyn jáne sheteldik tórelik sheshimderdi taný jáne oryndaý týraly Nıý-Iork konventsııasyn tolyqtyra otyryp, halyqaralyq daýlardy jeńildetilgen tártippen sheshýdi qamtamasyz etý sheńberindegi kemshilikterdi joıady.