Qazaqstan BUU-nyń halyqaralyq qatynastar arhıtektýrasyndaǵy asa mańyzdy rólin joǵary baǵalaıdy

ASTANA. QazAqparat – QR Syrtqy ister mınıstrligi Birikken Ulttar Uıymynyń Qazaqstan Respýblıkasyndaǵy 30 jyldyǵyna oraı málimdeme jasady, dep habarlaıdy QazAqparat mınıstrliktiń resmı saıtyna silteme jasap.

1992 jylǵy 2 naýryzda Birikken Ulttar Uıymy Bas Assambleıasynyń 46-shy sessııasynyń plenarlyq otyrysynda Qazaqstan Respýblıkasy BUU-ǵa resmı múshe bolyp, halyqaralyq qatynastardyń tolyqqandy sýbektisine aınaldy.

Bir jyldan keıin ataýly kúni 1993 jyldyń 16 aqpanynda respýblıkamyzdyń sáýlet eskertkishi bolyp tabylatyn Almaty qalasyndaǵy «Qazaqstan» qonaqúıinde Qazaqstandaǵy BUU ókildiginiń alǵashqy ofısi ashyldy. BUU-nyń Qazaqstandaǵy alǵashqy Turaqty ókili Naıdjel Rıngroýz boldy.

Sodan beri 30 jyl boıy Qazaqstan óziniń kópvektorly, teńdestirilgen syrtqy saıasatyn jalǵastyryp keledi jáne BUU-nyń jahandyq halyqaralyq máselelerdi sheshýdegi qyzmeti men kúsh-jigerin tolyq qoldaı otyryp, onyń halyqaralyq qatynastar arhıtektýrasyndaǵy asa mańyzdy rólin joǵary baǵalaıdy.

Atalǵan kezeń ishinde Qazaqstan men BUU myqty ári ózara tıimdi qarym-qatynas ornata bildi. Buǵan elimizdiń túrli salalarynda jobalyq qyzmetti júzege asyryp otyrǵan BUU-nyń 21 agenttiginiń bolýy men belsendi jumys isteýi dálel.

Bas hatshy Antonıý Gýterrısh bastamashylyq etken jumys keńistigin neǵurlym tıimdi paıdalanýdy qosa alǵanda, Ornyqty damý maqsattaryna (ODM) qol jetkizýde múshe memleketterge qoldaý kórsetý jónindegi uıymnyń qyzmetin nyǵaıtýǵa baǵyttalǵan BUU damý júıesin reformalaý úderisine praktıkalyq qoldaý kórsetý maqsatynda 2019 jylǵy 1 mamyrda QR Prezıdenti Qasym-Jomart Toqaev Almatyda qazirgi ýaqytta BUU-nyń on segiz sýbóńirlik, óńirlik jáne kópeldik mandatty agenttikteriniń ókilderi tabysty jumys istep kele jatqan halyqaralyq uıymdardyń zamanaýı ǵımaratyn saltanatty túrde ashty.

Elimizdiń 2030 jylǵa deıingi Ornyqty damý salasyndaǵy kún tártibine beıildiligin rastaı otyryp, Qazaqstan Respýblıkasy jahandyq uıymnyń óńirlik damý júıesin reformalaý sheńberinde tamasha úlgi bola alatyn Ortalyq Azııa men Aýǵanstan úshin ornyqty damý maqsattary boıynsha BUU-nyń Óńirlik ortalyǵyn Almatyda qurý týraly bastamasyn jarııalady.

«Osy múmkindikti paıdalana otyryp, BUU eldik komandasyn Qazaqstan Respýblıkasyndaǵy 30 jyldyǵymen quttyqtaımyz. Elimiz Uıymnyń Jarǵysyna jáne halyqaralyq quqyq qaǵıdattaryna óziniń berik mindettemesin taǵy da rastaıdy. BUU búkil adamzattyń múddeleri men shuǵyl qajettilikterine qyzmet etetin jalǵyz ámbebap uıym retinde taptyrmas bolyp qala beredi»,-delingen málimdemede.

Foto: t.me/pressmfakz