Qazaqstan BUU-nyń Sybaılas jemqorlyqqa qarsy konventsııasyna beıildiligin rastady

ASTANA. KAZINFORM — Qazaqstan delegatsııasy BUU-nyń Sybaılas jemqorlyqqa qarsy konventsııasyna qatysýshy memleketterdiń 11-shi konferentsııasyna qatysty. Bul týraly QR SІM baspasóz qyzmeti habarlady.

Eki jylda bir ret ótkiziletin konferentsııa bıyl Doha qalasynda 170 memleketten 2 500-den astam qatysýshyny jınady. Olardyń qatarynda memlekettik organdardyń, halyqaralyq jáne óńirlik uıymdardyń, azamattyq qoǵam ınstıtýttarynyń jáne sarapshylar qaýymdastyǵynyń ókilderi boldy.

Qazaqstan delegatsııasynyń quramyna Qazaqstan Respýblıkasy Ulttyq qaýipsizdik komıtetiniń Sybaılas jemqorlyqqa qarsy qyzmetiniń, sondaı-aq Bas prokýratýra men Syrtqy ister mınıstrliginiń ókilderi kirdi.

— Jalpy pikirtalastarda delegatsııa basshysy — QR UQK Sybaılas jemqorlyqqa qarsy qyzmeti dırektorynyń orynbasary Danııar Aqjanov — Qazaqstannyń Sybaılas jemqorlyqqa qarsy BUU konventsııasynyń maqsattary men qaǵıdattaryna berik beıildiligin rastap ótti. Qazaqstan zańdaryn jáne quqyq qoldaný tájirıbesin halyqaralyq standarttarǵa sáıkes keltirý úshin júıeli túrde jumys júrgizip jatyr. Bul jumysqa Birikken Ulttar Uıymynyń Esirtki jáne qylmys jónindegi basqarmasy men basqa da halyqaralyq seriktester belsendi túrde qoldaý kórsetip keledi, — delingen mınıstrlik habarlamasynda.

Sondaı-aq eldegi sybaılas jemqorlyqqa qarsy is-qımyl júıesindegi aǵymdaǵy ınstıtýtsıonaldyq ózgerister týraly aqparat usynylyp, buryn qabyldanǵan barlyq halyqaralyq jáne vedomstvoaralyq mindettemelerdiń saqtalatyny atalyp ótti.

Baıandamada quqyqbuzýshylyqtardyń aldyn alýǵa, ashyqtyqty arttyrýǵa jáne jaýapkershiliktiń bultartpastyǵyn qamtamasyz etýge baǵyttalǵan zamanaýı sybaılas jemqorlyqqa qarsy quraldardy engizýge erekshe nazar aýdaryldy.

Qazaqstandyq delegatsııa halyqaralyq yntymaqtastyqty odan ári keńeıtýge, ozyq tájirıbelermen almasýǵa jáne vedomstvoaralyq ári memleketaralyq deńgeılerde birlesken jobalardy iske asyrýǵa daıyn ekenin bildirip, sybaılas jemqorlyqqa qarsy tıimdi kúres tek turaqty dıalog, seriktestik jáne ınnovatsııalyq tásilderdi engizý arqyly múmkin ekenin atap ótti.

Konferentsııa aıasynda shet memleketterdiń delegatsııalarymen birqatar ekijaqty kezdesýler de ótti. Kelissózder barysynda sybaılas jemqorlyqqa qarsy ózara is-qımyldyń ózekti máseleleri talqylanyp, sybaılas jemqorlyqpen baılanysty quqyqbuzýshylyqtardy anyqtaý, jolyn kesý jáne tergep-tekserý salasyndaǵy tájirıbe, úzdik praktıkalar men saraptamalyq ázirlemeler almasý jóninde ýaǵdalastyqtarǵa qol jetkizildi.

Budan buryn Qazaqstan men Qatar eńbek mıgranttarynyń quqyqtaryn qorǵaý jónindegi yntymaqtastyqty rastaǵan edi.