Qazaqstan BUU-nyń Naırobıdegi keńsesimen ózara is-qımyldy jandandyrady
BUU-nyń Naırobıdegi (Kenııa) bólimshesiniń shtab-páterinde Qazaqstannyń Kenııadaǵy Elshisi Barlybaı Sadyqov BUU Bas hatshysynyń orynbasary, BUU-nyń Naırobıdegi (UNON) bólimshesiniń Bas dırektory Zaınab Hava Bangýra hanymǵa ókilettik sertıfıkatyn tabys etti. Bul týraly Kazinform Syrtqy ister mınıstrligine silteme jasap habarlaıdy.
Osylaısha Zaınab Hava Bangýra BUU-nyń Naırobıdegi bólimshesi janyndaǵy QR turaqty ókili bolyp taǵaıyndaldy.
Áńgimelesý barysynda Elshi 2030 jylǵa deıingi Turaqty damý maqsattaryna (TDM) qol jetkizý boıynsha BUU kún tártibin iske asyrý jónindegi Qazaqstan qabyldap jatqan sharalar týraly habardar etti.
Qazaqstannyń Almaty qalasyndaǵy BUU keńsesin Ortalyq Azııa men Aýǵanstan elderi úshin turaqty damý jónindegi BUU óńirlik ortalyǵy retinde qaıta uıymdastyrý bastamasy boıynsha pikir almasty.
Taraptar Qazaqstanda 2026 jyly BUU qamqorlyǵymen ekologııa boıynsha Óńirlik Sammıt ótkizý jónindegi QR usynysyn talqylady.
BUU Bas hatshysynyń orynbasary Z. Bangýra Qazaqstannyń halyqaralyq beıbitshilikti, qaýipsizdik pen ornyqty damýdy nyǵaıtýǵa qosqan zor úlesin atap ótti. Ol TDM iske asyrý boıynsha birlesip jumys isteýge, jobalardy iske asyrýǵa járdemdesýge daıyn ekenin bildirdi.
B.Sadyqov BUU Qorshaǵan ortany qorǵaý baǵdarlamasy (UNEP) basshysynyń mindetin atqarýshy Djıan Lıýmen jáne BUU basqarýshy uıymdarynyń bólim bastyǵy Ýlf Bornholmmen kezdesti. QR Turaqty ókili QR Prezıdentiniń UNEP Bas dırektory I. Andersenniń atyna joldanǵan 2024 jylǵy maýsymda Astana Halyqaralyq Forýmyna qatysýǵa shaqyrý hatyn tapsyrdy. Ol Qazaqstannyń ShYU-nyń tóraǵasy retinde BUU-nyń Naırobıdegi Klımat jónindegi Bas Assambleıasyna (UNEA-6) alǵash ret qatysý josparlary týraly eske saldy.
BUU-men ózara is-qımyldy keńeıtý, onyń ishinde UNEP-pen klımattyń ózgerýine beıimdelý jáne oǵan qarsy kúres salasyndaǵy zertteý yntymaqtastyǵyn damytý máseleleri talqylandy.
Sonymen qatar, Qazaqstannyń turaqty ókili Naırobıde ornalasqan Halyqty ornalastyrý jónindegi BUU baǵdarlamasynyń (UN-Habitat) Hatshylyǵynda UN-Habitat atqarýshy dırektorynyń orynbasary Maıkl Mlınarmen kezdesý ótkizdi. Kezdesý barysynda B.Sadyqov Qazaqstandaǵy qalalardyń damý jaı-kúıi týraly habardar etti, jergilikti turǵyndar úshin qalalyq qoǵamdyq ınfraqurylymnyń jaılylyǵy men ekologııalyq tazalyǵyn qamtamasyz etý úshin eldi mekenderdi turaqty ýrbanızatsııalaý jáne sapaly josparlaý salasyndaǵy BUU-men ózara is-qımyldyń perspektıvalyq baǵyttaryn atap ótti. Elimizde qala qurylysynyń ınklıýzıvtiligin, turaqtylyǵy men ekologııalyq tazalyǵyn qamtamasyz etý maqsatynda BUU-nyń osy qurylymymen yntymaqtastyqty jandandyrý týraly ýaǵdalastyqtarǵa qol jetkizildi.
Kezdesýlerdiń qorytyndysy boıynsha taraptar ózara múddelilik bildiretin BUU kún tártibindegi máseleler boıynsha tyǵyz ózara is-qımyl jasaýǵa kelisti.
