Qazaqstan BUU-nyń kıberqylmysqa qarsy konventsııasyna qol qoıdy
ASTANA. KAZINFORM — Qazaqstan Respýblıkasy Іshki ister mınıstriniń birinshi orynbasary polıtsııa general-maıory Baýyrjan Álenov bastaǵan delegatsııa Vetnam astanasy Hanoı qalasynda ótken BUU-nyń kıberqylmysqa qarsy konventsııasyna qol qoıý rásimine qatysty. Bul týraly Polisia.kz jazdy.
Atalǵan qujat aqparattyq-kommýnıkatsııalyq tehnologııalar salasyndaǵy qylmystarǵa qarsy kúrestegi halyqaralyq yntymaqtastyqty nyǵaıtýǵa jáne jahandyq kıberqaýipsizdik deńgeıin arttyrýǵa baǵyttalǵan.
QR ІІM Konventsııa jobasyn ázirleý barysynda ulttyq múddelerdi ustana otyryp, memleketter arasyndaǵy ózara is-qımyldyń tıimdi tetikterin qalyptastyrýǵa baǵyttalǵan usynystar engizip, belsendi jumys atqardy.
Konventsııaǵa qol qoıý Qazaqstannyń tsıfrlyq qaýipsizdikti qamtamasyz etý, kıberqaterlerge qarsy is-qımyldyń ulttyq júıesin jetildirý jáne kıberqaýipsizdik salasynda basqa eldermen áriptestikti nyǵaıtý jónindegi memlekettik saıasatyn iske asyrýdaǵy mańyzdy qadam boldy.
Konventsııaǵa qosylý Qazaqstanǵa:
- basqa eldermen elektrondyq dáleldemelermen jedel almasýǵa;
- transshekaralyq kıberqylmystardy tergeý kezinde tıimdi ózara is-qımyl jasaýǵa;
- azamattardy ınternet-alaıaqtyqtan, kıbershabýyldardan jáne tsıfrlyq keńistiktegi ózge de qaýipterden qorǵaýǵa múmkindik beredi.
Eske sala keteıik, buǵan deıin BUU-nyń kıberqylmys týraly konventsııasyna qosylý ne úshin mańyzdy ekenin jazǵan edik.