Qazaqstan BUU-nyń elektrondyq úkimetti damytý reıtınginde 16-orynǵa kóterildi

ASTANA. KAZINFORM — Qazaqstan alǵash ret BUU reıtınginiń úzdik 20 eli qataryna jáne eń joǵary reıtıngtik sanatyna endi. Bul týraly Úkimettiń baspasóz qyzmeti habarlady.

tsıfrovızatsııa
Foto: Kazinform / JI

Qazaqstan BUU-nyń Elektrondyq úkimetti damytý ındeksinde (UN EGDI) 24-orynnan 16-orynǵa kóterilip, alǵash ret eń joǵary reıtıngtik sanatqa endi. Eki jyl ishinde 8 satyǵa joǵarylaý BUU baıandamasynda kóshbasshy elder arasyndaǵy eń eleýli ilgerileýdiń biri retinde ataldy. Qazaqstan osyndaı deńgeıge jetken óńirdegi alǵashqy el boldy. Bul nátıje Memleket basshysynyń Qazaqstandy tolyqqandy tsıfrlyq elge aınaldyrý jónindegi tapsyrmasyn iske asyrýdyń jáne memlekettik basqarýdy transformatsııalaýdyń negizgi quraly retinde jasandy ıntellektini damytýǵa basymdyq berýdiń tikeleı nátıjesi.

Eń joǵary reıtıngtik sanatqa elektrondyq úkimeti barynsha damyǵan álemniń 21 memleketi kiredi. Qazir Qazaqstan Koreıa, Danııa, Sıngapýr, Ulybrıtanııa, Estonııa jáne AQSh-pen bir qatarda. 2026 jyly bul sanatqa alǵash ret bar bolǵany úsh el: Qazaqstan, Irlandııa jáne Polsha endi.

Qazaqstan BUU-nyń elektrondyq úkimetti damytý reıtınginde 16-orynǵa kóterildi
Foto: Úkimet

Eki jyl ishinde Qazaqstan 2024 jyly reıtıngte ózinen joǵary turǵan Shvetsııa, Germanııa, Irlandııa, Jańa Zelandııa, Avstrııa jáne Japonııadan ozyp ketti. El ındeksi álemdik ortasha kórsetkish 0,6675 bolǵan jaǵdaıda 0,9009-dan 0,9363-ke deıin ósti.
Eki jyl ishinde tsıfrlyq memleket qurýdyń úlgisi retinde tanylǵan Estonııamen aradaǵy alshaqtyq tórt ese qysqardy. TMD jáne Ortalyq Azııa elderi arasynda Qazaqstan taǵy da birinshi orynda. Álemdik reıtıngte Ózbekstan 32-orynda, Ázerbaıjan 38-orynda, Reseı 50-orynda tur.

Ósim negizgi baǵyttardyń barlyǵy boıynsha qamtamasyz etildi. BUU baılanys salasyndaǵy aıtarlyqtaı ilgerileýdi atap ótti: mobıldi baılanys pen ınternettiń qoljetimdiligi boıynsha Qazaqstan álemdik reıtıngte 41-orynnan 13-orynǵa kóterilip, telekommýnıkatsııalyq ınfraqurylym deńgeıi boıynsha Estonııamen teńesti. Azamattar tsıfrlyq servısterdi belsendi ári senimdi paıdalana bastady: tsıfrlyq saýattylyq kórsetkishi shamamen 1,5 ese ósti, al bilim men daǵdylar deńgeıi boıynsha el 42-orynnan shamamen 28-orynǵa kóterildi. Tsıfrlyq úkimettiń quqyqtyq bazasy BUU tarapynan eń joǵary baǵaǵa ıe boldy.

BUU baıandamasynda Ortalyq Azııa 2026 jyldyń basty tabys tarıhtarynyń biri retinde ataldy. eGov.kz jáne eGov Mobile ekojúıesi ıntegratsııalanǵan tsıfrlyq memlekettiń úlgisi retinde, al alem.ai halyqaralyq ortalyǵy bilim berý, zertteý, startaptar jáne qoldanbaly jasandy ıntellektini damytý alańy retinde atap ótildi.

BUU sarapshylarynyń baǵalaýynsha, Qazaqstan qol jetkizgen joǵary deńgeıine súıene otyryp, óz pozıtsııasyn odan ári nyǵaıtyp keledi. Mundaǵy jetistik jekelegen saıttardyń damýymen ǵana shektelmeıdi, ol memlekettik organdardyń ózara is-qımyl platformalaryn, tsıfrlyq sáıkestendirýdi, mobıldi servıster men halyqqa qyzmet kórsetý ortalyqtaryn biriktiretin biryńǵaı júıeniń qalyptasýymen baılanysty.

Bul nátıjeniń negizinde ne jatyr?

Memleket basshysy Qazaqstandy úsh jyl ishinde tolyqqandy tsıfrlyq elge aınaldyrý mindetin qoıyp, 2026 jyldy Tsıfrlandyrý jáne jasandy ıntellekt jyly dep jarııalady. Osy tapsyrmany júıeli túrde iske asyrý jáne jasandy ıntellektini memlekettik basqarýǵa engizý Qazaqstannyń álemdik kóshbasshylar qatarynan oryn alýyna múmkindik bergen sheshýshi faktorlarǵa aınaldy.

Sońǵy jyldary Qazaqstanda tsıfrlyq memleket is júzinde jańadan qalyptastyryldy. Elektrondyq úkimetti damytý jolyndaǵy jumystardy jalǵastyra otyryp, bıyl elde jańa býyn eGov platformasy quryldy. Jasandy ıntellekt dáýirinde mıllıondaǵan paıdalanýshy úshin senimdi ári qaýip-qaterge tózimdi bolý úshin platforma zamanaýı tehnologııa negizinde tolyq jańartyldy.

Sonymen qatar memlekettik qyzmet kórsetý tásili de ózgerdi. Memlekettik derekter bazalary ózara biriktirildi. Endi azamattarǵa anyqtamalar jınap, qujattardy skanerlep, qaıta tirkeýdiń qajeti joq, júıe qajetti málimetterdi ózdiginen tabady. Qyzmetterdiń basym bóligi tolyqtaı tsıfrlyq formatqa kóshirilip jatyr. Al qyzmetti jeke baryp alǵandy jón kóretin azamattar úshin jasandy ıntellekt kómegimen jumys isteıtin ózine-ózi qyzmet kórsetý aımaqtary – AI-TsON-dar ashylýda. Bıznes úshin de jeke tsıfrlyq orta qalyptasty: eGov Business kásipkerlerge dástúrli qaǵaz qujat aınalymynan bas tartýǵa múmkindik beredi.

Alaıda Qazaqstandy shyn máninde tsıfrlyq elge aınaldyrý úshin tehnologııalardyń ózi jetkiliksiz. Sondyqtan memleket adam kapıtaly men ınfraqurylymdy damytýǵa, azamattardyń tsıfrlyq daǵdylaryn arttyrýǵa, ár óńirde qoljetimdi ári sapaly ınternet pen mobıldi baılanysty qamtamasyz etýge qatar ınvestıtsııa saldy. BUU baıandamasynda eń eleýli ósim dál osy baǵyttar boıynsha tirkelgen.

Búginde Qazaqstandaǵy memlekettik qyzmetterdiń 90%-dan astamy onlaın qoljetimdi, al azamattardyń basym bóligi úshin memleket smartfonda. eGov.kz portalynda 16,4 mln-nan astam paıdalanýshy tirkelgen. Tek 2026 jyldyń qańtar-qazan aılary aralyǵynda eGov arqyly 51 mln-nan astam qyzmet kórsetildi. Onyń úshten ekisine jýyǵyn azamattar smartfon arqyly aldy.

Sonymen qatar elde jańa tsıfrlyq ekonomıkanyń quqyqtyq negizi qalyptastyryldy. Azamattardyń tsıfrlyq quqyqtaryn alǵash ret keshendi túrde bekitken Tsıfrlyq kodeks qabyldandy. «Jasandy ıntellekt týraly» zań kúshine endi. Tehnologııalyq baza da damyp keledi: alem.ai halyqaralyq jasandy ıntellekt ortalyǵy ashyldy, al qazaqstandyq sýperkompıýter TOP500 reıtıngi boıynsha álemdegi eń qýatty júz esepteý júıesiniń qataryna endi.

– Reıtıng biz úshin eshqashan túpki maqsat bolǵan emes, ol aýqymdy ári júıeli jumystyń nátıjesine aınaldy. Memleket basshysy Qazaqstandy úsh jyl ishinde tolyqqandy tsıfrlyq elge aınaldyrý jóninde naqty mindet qoıdy. Nátıjege jekelegen jobalar emes, júıeli jumys arqyly qol jetkizildi. Óıtkeni BUU jekelegen saıttardy emes, memlekettiń tutas qalaı jumys isteıtinin baǵalaıdy. Jasandy ıntellektke basymdyq berý óz tıimdiligin kórsetti: ol bıýrokratııalyq protsesterdi óz moınyna alyp, adamdarǵa strategııalyq jáne shyǵarmashylyq mindetterge ýaqyt bólýge múmkindik beredi. BUU baıandamasynda Ortalyq Azııanyń Qazaqstannyń arqasynda alǵash ret kóshbasshylar tobyna engeni atap ótildi. Aldymyzda turǵan kelesi mindet – azamat ózi suranys bildirmeı turyp-aq qajetti qyzmetterdi usynatyn memleket qalyptastyrý, – dep atap ótti QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev.

Bul nátıje Memleket basshysynyń 2026 jyldy Tsıfrlandyrý jáne jasandy ıntellekt jyly dep jarııalaýy arqyly bekitilgen júıeli memlekettik saıasattyń jemisi boldy.

Anyqtama:

UN E-Government Survey – BUU-nyń Ekonomıkalyq jáne áleýmettik máseleler jónindegi departamenti eki jylda bir ret jarııalaıtyn baıandama. Reıtıng BUU-ǵa múshe 193 memleketti qamtıdy jáne onlaın qyzmetterdi, telekommýnıkatsııalyq ınfraqurylymdy jáne adamı kapıtaldy baǵalaıdy. Elder tórt topqa jáne 16 reıtıngtik sanatqa bólinedi. Eń joǵary VH sanatyna elektrondyq úkimeti barynsha damyǵan memleketter kiredi.