Qazaqstan BUU-nyń Elektrondyq úkimetti damytý ındeksinde 24-orynda — JI mınıstri
ASTANA.KAZINFORM — Úkimet otyrysynda QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev elimizdiń saladaǵy jetistikterin málimdedi.
— Memlekettik qyzmet kórsetý salasynda biz edáýir transformatsııadan óttik. Kompıýterdegi memlekettik qyzmetter portalynan — mobıldi qosymshaǵa deıin. Al odan keıin — qyzmetter boıynsha keńes beretin eGov-taǵy AI-kómekshi jáne 1414 AI koll-ortalyǵyn iske qostyq. Bul jumys halyqaralyq deńgeıde joǵary baǵalanyp otyr, — dedi ol.
Sonymen qatar, búginde Qazaqstan Birikken Ulttar Uıymynyń Elektrondyq úkimetti damytý ındeksinde álem boıynsha 24-orynda.
— Biz jasandy ıntellektini engizý jáne qyzmetterdi únemi jaqsartý arqyly odan da joǵary kórsetkishterge senimdi qadam basyp kelemiz, — dedi mınıstr.
Aıta keteıik, buǵan deıin eGov 3.0 portalynyń jańa nusqasy iske qosylǵanyn jazǵanbyz.
