Qazaqstan BUU mıssııasyna qandaı úles qosyp jatyr
ASTANA. KAZINFORM – Qazaqstan Birikken Ulttar Uıymyndaǵy belsendi qyzmetimen tanymal. Elimizdiń bastamalary men róli týraly uıymnyń Qazaqstandaǵy keńsesiniń baspasóz qyzmetiniń basshysy Elnara Baınazarova baıandady.
– BUU bıyl 80 jyldyq mereıtoıyn atap ótti. Uıymnyń maqsaty – álem tynyshtyǵy men soǵystyń aldyn alý, qaýipsizdikti qamtamasyz etý. Degenmen jańa kezeń jańa mindetterdi alǵa shyǵarýda. Klımat máseleleri, jasandy ıntellektini jaýapty paıdalaný, jalǵan aqparatpen kúres – uıym mıssııasynyń keńeıgen jańa baǵyttary, - dedi Elnara Baınazarova Jibek Joly arnasynyń «Búgin LIVE» baǵdarlamasynda.
Spıker uıymnyń Qazaqstandaǵy jumysyna toqtaldy.
– Uıymnyń keńseleri Almaty men Astanada ornalasqan, 400-ge jýyq qyzmetker jumys isteıdi. Qazaqstanda BUU-nyń 27 agenttigi bar. Olardyń qyzmeti damý baǵdarlamasy, balalar máselesi, densaýlyq saqtaý, bilim berý, mıgratsııa syndy baǵyttardy qamtıdy, - dedi ol.
Elnara Baınazarova Qazaqstannyń bastamalaryna da nazar aýdardy.
– ıAdrolyq synaqtardyń zardabyn tartqan el retinde Qazaqstan ıadrolyq qarýǵa tyıym salýdy únemi qoldap keledi. Semeı polıgonynyń jabylýy sonyń dáleli. Sonymen birge Azııadaǵy ózara senim sharalary jónindegi keńesti qurý, álemdik dinder kóshbasshylaryn Astanada jınaý – Qazaqstannyń BUU-daǵy mańyzdy qadamdary. 2017-2018 jyldary elimiz BUU Qaýipsizdik keńesiniń turaqty emes múshesi boldy. Bıyl Bas hatshy Antonıý Gýterrıshtiń Almatyǵa sapary barysynda Ortalyq Azııa men Aýǵanstanǵa arnalǵan BUU-nyń Ornyqty damý maqsattary jónindegi aımaqtyq ortalyǵyn qurý máselesi kóterildi, - dedi spıker.
Ol sondaı-aq Qazaqstannyń BUU-nyń ózge qurylymdaryndaǵy rólin atap ótti.
– BUU Adam quqyqtary jónindegi keńesinde, uıymnyń áleýmettik-ekonomıkalyq keńesinde Qazaqstan belsendi jumys istep keledi. Ótken jyly Madına Jarbosynova BUU-nyń áıelderge qatysty kemsitýshilikti joıý komıtetine qabyldandy. Bul – qazaq dıplomatııasynyń iri jetistigi, - dedi Elnara Baınazarova.
Aıta keteıik, buǵan deıin Astanada BUU-nyń 80 jyldyǵyna arnalǵan fotokórme ashyldy.