Qazaqstan BUU kongresinde qarjylyq qylmysqa qarsy kúres tájirıbesin tanystyrdy
ASTANA. KAZINFORM- Qazaqstan Respýblıkasy Qarjylyq monıtorıng agenttiginiń delegatsııasy Birikken Arab Ámirlikterinde ótken BUU-nyń Qylmystyń aldyn alý jáne qylmystyq sot tóreligi jónindegi XV kongresine qatysty.
Kongress transulttyq qylmysqa, qylmystyq sot tóreligine, kıberqylmysqa jáne qarjylyq quqyqbuzýshylyqtarǵa qarsy kúres salasyndaǵy ýákiletti organdardyń ókilderin biriktirdi.
Agenttik qarjylyq qylmystarǵa jáne qylmystyq kiristerdi jylystatýǵa qarsy is-qımylda táýekelge baǵdarlanǵan tásildi qoldaný tájirıbesin tanystyrdy.
Sondaı-aq drop-kartalardy, vırtýaldy aktıvterdi jáne qylmyskerlerge qarajatty ártúrli ıýrısdıktsııalar arasynda aýdaryp, onyń izin jasyrýǵa múmkindik beretin ózge de tsıfrlyq quraldardy paıdalanýǵa baılanysty qazirgi qaýipterge qarsy qabyldanyp jatqan sharalar baıandaldy.
Qylmystyq kiristerdi zańdastyrýdyń jańa shemalaryn der kezinde anyqtaý jáne kúdikti operatsııalarǵa jedel den qoıý maqsatynda memleket pen jeke sektor arasyndaǵy áriptestikti damytý jóninde aqparat berildi.
Іs-shara qorytyndysy boıynsha qarjylyq qylmysqa qarsy kúreste quzyretti organdarmen ózara is-qımyldy odan ári nyǵaıtý jáne halyqaralyq yntymaqtastyqty damytý týraly ýaǵdalastyqqa qol jetkizildi.
Anyqtama úshin: Kongress BUU Esirtki jáne qylmys jónindegi basqarmasynyń qoldaýymen bes jylda bir ret ótkiziledi.
Osyǵan deıin uıymdasqan qylmystyq top múshelerine qatysty 45 qylmystyq is sotqa joldanǵany týraly jazdyq.
