Qazaqstan BUU QK Taıaý Shyǵys pen Soltústik Afrıka jónindegi pikirtalasyna qatysty

ASTANA. QazAqparat - Qazaqstandyq delegatsııa Qaýipsizdik Keńesiniń «Halyqaralyq beıbitshilik pen qaýipsizdikti qamtamasyz etý: Taıaý Shyǵys pen Soltústik Afrıkadaǵy jaǵdaıdy jan-jaqty sholý» ashyq pikirsaıysyna qatysty, dep habarlaıdy QazAqparat QR SІM baspasóz qyzmetine silteme jasap. 

Otyrys Reseı Federatsııasy syrtqy ister mınıstriniń orynbasary Sergeı Vershınınniń tóraǵalyǵymen ótti.

BUU janyndaǵy Qazaqstannyń turaqty ókili Qaırat Omarov óz sózinde Taıaý Shyǵystaǵy qaqtyǵystardyń Afrıka, Ońtústik jáne Ońtústik-Shyǵys Azııa, Eýropa jáne basqa aımaqtarǵa keri áser etip jatqanyn atap ótti.

«BUU múshe elderi, Qaýipsizdik Keńesiniń músheleri jáne arab memleketteri, Izraıl, Iran arasyndaǵy yntymaqtastyq pen senimdi nyǵaıtý arqyly bul máseleni sheshýge bolady», - dep málim etti qazaqstandyq dıplomat.

Qazaqstan delegatsııasynyń málimdemesi Prezıdent Nursultan Nazarbaevtyń «Beıbitshilik. XXI ǵasyr» manıfestinde baıandalǵan sózderine negizdelgen.

Qazaqstandyq tarap bárin tegis qamtı alatyn gýmanıtarlyq jospar jasaýdy usyndy. Ony shıeleniske qatysy bar elderdiń úkimetteri BUU jáne basqa da halyqaralyq uıymdarmen tyǵyz qarym-qatynas jasaı otyryp, qurýy tıis.

Qazaqstan ókili BUU jarǵysyna sáıkes, soǵys júrip jatqan elderde táýelsizdik pen egemendikti qurmetteýdiń mańyzdylyǵyn atap ótti.