Qazaqstan BUU QK aıasynda Aımaqtyq terrorızmge qarsy qurylymnyń konferentsııasyna qatysty

ASTANA. QazAqparat -Qazaqstannyń BUU janyndaǵy Turaqty ókili Qaırat Omarov BUU Qaýipsizdik Keńesiniń 1267 jáne 1988 sanktsııalyq komıtetter tóraǵasy retinde «Terrorızmmen kúres - shekarasyz yńtymaqtastyq» atty Besinshi ǵylymı-praktıkalyq konferentsııaǵa qatysty. Tashkent qalasynda ótken konferentsııany Shanhaı yńtymaqtastyq uıymy Aımaqtyq terrorızmge qarsy qurylymy (ShYU ATQ) uıymdastyrǵan bolatyn, dep habarlaıdy QazAqparat SІM baspasóz qyzmetine silteme jasap.

Sharaǵa birqatar halyqaralyq uıymdar men ShYU-ǵa múshe jáne baqylaýshy memleketterdiń quzyretti organdary men hatshylyq ókilderi qatysty. Atap aıtqanda, olardyń arasynda BUU Terrorızmge qarsy basqarmasy, BUU QK Terrorızmge qarsy Atqarýshy dırektoraty, BUU QK 1267 jáne 1988 sanktsııalyq komıtetteri, BUU Esirtki jáne qylmys jónindegi basqarmasy, Ortalyq Azııa úshin aldyn alý dıplomatııasy boıynsha BUU Aımaqtyq ortalyǵy, Eýropadaǵy qaýipsizdik jáne yntymaqtastyq uıymy bar.

Jıynda halyqaralyq terrorıstik uıymdardan týyndaıtyn qaýip-qaterlerge qarsy turýdaǵy ózekti máseleler qaraldy. Qatysýshylar qazirgi álemdegi jaǵdaıdy boljaýdyń turaqsyzdyǵy men kúrdeliligin atap ótti. Olardyń pikirinshe, Taıaý Shyǵystaǵy antıterrorlyq kúshterdiń jáne lańkesterdi yǵystyrý operatsııalarynyń nátıjesinde, kóptegen terrorıster álemniń basqa da bólikterine, sonyń ishinde Aýǵanstanǵa kóship jatqandyǵy baıqalýda. Bul rette qatysýshylar ShYU-ǵa múshe memleketterdiń shekaralary Aýǵanstanǵa jaqyndyǵyn eskere otyryp, terrorızm qaýpiniń Uıym aýmaǵyna qosymsha qaterler týdyratynyn alǵa tartady. Osyǵan baılanysty konferentsııada Internetti lańkestik jáne ekstremıstik maqsattarda paıdalanýǵa qarsy turý, sondaı-aq terrorızmdi qarjylandyrýǵa qarsy is-qımyldardy úılestirý jónindegi sharalarǵa erekshe nazar aýdaryldy. Bul rette jedel aqparat almasýǵa qatysty yntymaqtastyqty arttyrý qajettiligine kóńil bólinip, shekaralyq baqylaýdy kúsheıtý, terrorızmge qarsy is-qımyl baǵytynda derekqorlardy ózara ıntegratsııalaý máselesine qoldaý bildirildi.

Jıyn barysynda Qaırat Omarov DAISh jáne «Ál-Kaıda» tarapynan týyndaǵan qaýip-qaterlerge baǵa berip, atalmysh terrorlyq toptardyń Aýǵanstannyń soltústik aımaqtarynda kúsheıip jatqandyǵyn qaperge saldy.

Konferentsııaǵa qatysýshylar terrorlyq uıymdarǵa qarsy turýda sanktsııalyq rejımderdiń negizgi erekshilikterine de nazar aýdartyp otyr. Bul rette sarapshylar BUU-ǵa múshe memleketter sanktsııalyq tetikterdi terrorızmge qarsy kúrestiń ulttyq strategııalarynda qoldanýy qajettigin alǵa tartady. Sonymen qatar, konferentsııaǵa qatysýshylar halyqaralyq qoǵamdastyqty jahandyq terrorızmge qarsy BUU Qaýipsizdik Keńesiniń sanktsııalyq komıtterimen yńtymaqtastyqty nyǵaıtýǵa shaqyrdy.