Qazaqstan BUU Qaýipsizdik Keńesiniń quramyn keńeıtýdi qoldaıdy — Qasym-Jomart Toqaev
ASTANA. KAZINFORM — Bárimiz BUU Jarǵysyn múltiksiz saqtaýymyz qajet. Bul týraly Astana halyqaralyq forýmynda Memleket basshysy Qasym-Jomart Toqaev málim etti.
— Jyl sońyna taman Nıý-Iorkte BUU-nyń 80 jyldyǵyn atap ótemiz. 1945 jyly, ıaǵnı, dúnıe júzindegi surapyl soǵystan keıin 51 memleket birge qurǵan bul Uıym beıbit ári qaýipsiz álemdi qurýdyń batyl jolyn usyndy. Búginde Uıymǵa 193 el múshe. Osylaısha, ol álemdegi quramy áralýan, kúrdeli ári ózara tyǵyz baılanysqan qoǵamdastyqqa aınaldy. Áıtse de BUU-nyń negizgi tarmaqtary, ásirese, Qaýipsizdik Keńesi múldem ózgergen joq. 80 jyl buryn jasalǵan ınstıtýtsıonaldy qurylym men qazirgi zaman arasynda alshaqtyq kóp. Bul Uıymǵa jáne onyń tıimdiligine degen senimge selkeý túsiredi, — dedi Qasym-Jomart Toqaev.
Prezıdenttiń paıymynsha, mıllıardtaǵan adamnyń taǵdyryna áser etetin asa mańyzdy sheshimdi birneshe eldiń qabyldaǵany durys emes. Sondyqtan Qazaqstan BUU Qaýipsizdik Keńesiniń quramyn keńeıtip, oǵan álemniń ár óńirinen ókil qosý týraly ustanymdy qoldaıdy.
— BUU ózektiligin joǵaltpaı, qazirgi zamannyń talaptaryna saı bolýy úshin Qaýipsizdik Keńesine qurylymdyq reforma jasalýǵa tıis. Alpaýyt elder beıbitshilik pen qaýipsizdikti saqtaýǵa beıil ekenin anyq bildirýi kerek. Ári barlyq memlekettiń terrıtorııalyq tutastyǵyn qorǵaý týraly eń basty qaǵıdattan aınymaýǵa tıis. Bárimiz BUU Jarǵysyn múltiksiz saqtaýymyz qajet. Onyń negizgi prıntsıpterine ústirt nemese nemquraıly qaraýdan aýlaq bolýymyz kerek. Sonda ǵana Birikken Ulttar Uıymynyń abyroı-bedeline degen senimdi qalpyna keltire alamyz, — dedi Memleket basshysy.
Budan buryn habarlanǵandaı, elordada Memleket basshysy Qasym-Jomart Toqaevtyń qatysýymen Astana halyqaralyq forýmy jumysyn bastady.