Qazaqstan BUU Qaýipsizdik Keńesiniń Gazadaǵy atysty toqtatý jónindegi qararyn quptady
ASTANA. KAZINFORM – QR Syrtqy ister mınıstrligi BUU Qaýipsizdik Keńesiniń Gazadaǵy qaqtyǵysty toqtatýǵa baǵyttalǵan keshendi jospar týraly 2803 (2025) qararynyń qabyldanýyn quptaıtynyn málimdedi.
Vedomstvo atalǵan qarardy qoldaı otyryp, Amerıka Qurama Shtattarynyń, Prezıdent Donald Tramptyń jáne atysty toqtatý jónindegi kelisimge qol jetkizýge mańyzdy úles qosqan ózge de memleketterdiń kúsh-jigerin joǵary baǵalaıdy.
QR SІM málimdemesinde qarardyń qabyldanýy Gaza sektoryndaǵy jaǵdaıdy turaqtandyrýǵa, taraptar arasyndaǵy senimdi qalpyna keltirýge jáne Taıaý Shyǵysta uzaq merzimdi beıbitshilik ornatýǵa baǵyttalǵan mańyzdy qadam ekeni atap ótildi.
Mınıstrlik Qazaqstannyń BUU Jarǵysyna, Qaýipsizdik Keńesiniń tıisti qararlaryna, halyqaralyq gýmanıtarlyq quqyq normalaryna jáne táýelsiz, ómirsheń ári aýmaqtyq tutastyǵy qamtamasyz etilgen Palestına memleketin qurýdy kózdeıtin «eki halyq úshin eki memleket» qaǵıdatyna negizdelgen Taıaý Shyǵys máselesiniń beıbit, keshendi jáne ornyqty sheshimin únemi qoldaıtynyn jetkizdi.
- Sonymen qatar Qazaqstan Ibrahım kelisimderi aıasynda barlyq seriktestermen, onyń ishinde protsestegi negizgi dánekerlermen syndarly túrde yntymaqtastyq ornatýǵa daıyn jáne jaǵdaıdy turaqtandyrýǵa, gýmanıtarlyq kómekti arttyrýǵa, sondaı-aq uzaq merzimdi saıası protseske jaǵdaı jasaýǵa baǵyttalǵan halyqaralyq kúsh-jigerge ári qaraı da úles qosa beredi, - delingen málimdemede.
Aıta keteıik, Túrkııa Izraıldi Gazadaǵy atysty toqtatý rejımin saqtaýǵa shaqyrdy.