Qazaqstan BUU Qaýipsizdik Keńesine jańa múshe-memleketterdiń tý ornatý rásimin ótkizdi

ASTANA.KAZINFORM – Birikken Ulttar Uıymynyń shtab-páterinde Qazaqstannyń BUU janyndaǵy Turaqty ókildigi 2026-2027 jyldarǵa saılanǵan BUU Qaýipsizdik Keńesiniń jańa turaqty emes músheleriniń týlaryn saltanatty túrde ornatý rásimin ótkizdi. Bul týraly QR Syrtqy ister mınıstrligi habarlady.

Qaýipsizdik Keńesiniń májilis zaly aldynda Bahreın, Kolýmbııa, Kongo Demokratııalyq Respýblıkasy, Latvııa jáne Lıberııanyń Turaqty ókilderi óz elderiniń memlekettik týlaryn ornatyp, atalǵan elderdiń Qaýipsizdik Keńesiniń quramyna resmı túrde kirgenin bildirdi.

Qaýipsizdik Keńesiniń jańa jyldaǵy jumysynyń birinshi kúninde saltanatty rásimdi ótkizý dástúri 2018 jyldyń qańtar aıynda, Qazaqstannyń Qaýipsizdik Keńesine tóraǵalyǵy kezeńinde bastaý alǵan bolatyn. Sodan beri bul tájirıbe Keńestiń barlyq múshesi tarapynan dáıekti túrde qoldaý taýyp, sońǵy jyldary Qazaqstannyń Turaqty ókildigi úılestirýimen júzege asyrylyp keledi.

Atap óterligi, BUU Qaýipsizdik Keńesi tóraǵasynyń 2025 jylǵy 26 jeltoqsandaǵy №S/2025/848 jazbasy arqyly rásimdelgen Keńes sheshimine sáıkes, atalǵan saltanatty shara Qaýipsizdik Keńesiniń resmı jyl saıynǵy is-sharasy retinde biraýyzdan qabyldanyp, onyń jumys ádisterine engizildi. Osylaısha, Qazaqstan bastamasy ınstıtýtsıonaldyq turǵydan bekitilip, Qaýipsizdik Keńesiniń rásimdik ári sımvolıkalyq mádenıetiniń turaqty elementine aınaldy.

Іs-sharany asha otyryp, Qazaqstan Respýblıkasynyń BUU janyndaǵy turaqty ókili Qaırat Omarov qazirgi geosaıası shıelenis jaǵdaıynda Birikken Ulttar Uıymy men Qaýipsizdik Keńesiniń turaqty jáne turaqty emes músheleriniń belsendi qatysýymen qabyldanatyn sheshimderi jahandyq beıbitshilik pen halyqaralyq qaýipsizdikti qamtamasyz etý, sondaı-aq ornyqty damýǵa járdemdesý turǵysynan aıryqsha mańyzǵa ıe ekenin atap ótti.

BUU Bas hatshysynyń atynan sóz sóılegen Taıaý Shyǵys jáne Azııa-Tynyq muhıt aımaǵynyń máseleleri boıynsha Bas hatshynyń kómekshisi Haled Hıarı Qaýipsizdik Keńesiniń jahandyq qaýipsizdik arhıtektýrasyndaǵy negizgi rólin atap ótip, Keńes jumysy sheńberinde senimdi nyǵaıtýǵa, dıalogty ilgeriletýge jáne ınstıtýtsıonaldyq sabaqtastyqty qamtamasyz etýge qosqan Qazaqstannyń úlesin joǵary baǵalady.

2026 jylǵy qańtar aıyndaǵy Qaýipsizdik Keńesiniń tóraǵasy retinde sóz sóılegen Somalı Respýblıkasynyń BUU janyndaǵy Turaqty ókili Abýkar Dahır Osman halyqaralyq beıbitshilik pen qaýipsizdikke tónetin qazirgi zamanǵy syn-qaterler men qaýipterge birlesip den qoıý maqsatynda memleketterdi belsendi ári úılestirilgen ózara is-qımylǵa shaqyrdy.

Óz kezeginde, Qaýipsizdik Keńesiniń jańadan saılanǵan músheleriniń ókilderi qysqasha sóz sóılep, saltanatty rásimdi uıymdastyrǵany úshin qazaqstandyq tarapqa alǵys bildirip, 2026-2027 jyldar kezeńinde Qaýipsizdik Keńesindegi qyzmetiniń negizgi basymdyqtaryn atap ótti.

BUU Qaýipsizdik Keńesinde bes turaqty múshe memleket (AQSh, Qytaı, Reseı, Ulybrıtanııa jáne Frantsııa) jáne 10 turaqty emes múshe memleket qyzmet atqarady. Olar jyl saıyn BUU Bas Assambleıasynyń sheshimimen eki jyldyq merzimge saılanady.

Atalǵan saltanatty rásim Qaýipsizdik Keńesiniń jańadan saılanǵan músheleri úshin aıryqsha mańyzǵa ıe bolyp, halyqaralyq beıbitshilik pen qaýipsizdikti qamtamasyz etýge jaýapty BUU-nyń basty organyndaǵy atalǵan elder mandatynyń saltanatty bastalýyn bildiredi. Ulttyq týlardy kóterý memleketterdiń Qaýipsizdik Keńesiniń quramyna ený sátine erekshe saıası ári sımvolıkalyq mán berip, Keńes músheleriniń búkil halyqaralyq qaýymdastyq aldyndaǵy ortaq jaýapkershiligin aıqyndaıdy.

Qazaqstannyń bastamasyna deıin Qaýipsizdik Keńesiniń turaqty emes músheleriniń týlaryn aýystyrý rásimi negizinen tehnıkalyq sıpatta júrgizilip keldi. Alaıda 2018 jyldan bastap atalǵan jańashyldyqtyń arqasynda bul úderis buqaralyq aqparat quraldary ókilderiniń qatysýymen Qaýipsizdik Keńesiniń alǵashqy jumys kúni ótkiziletin resmı saltanatty rásim formatyna ıe boldy.

2019 jyldyń qańtar aıynda Qazaqstannyń Turaqty ókildigi Qaýipsizdik Keńesiniń múshe memleketteriniń týlary úshin Qazaqstanda jasalǵan jáne ulttyq oıý-órnektermen bezendirilgen arnaıy tuǵyrlar syıǵa tartty.

Aıta keteıik, Nıý-Iorkte BUU Qaýipsizdik keńesiniń Venesýela boıynsha shuǵyl otyrysy ótti.