Qazaqstan BUU Qaýipsizdik Keńesiniń Aýǵanstan jónindegi otyrysyna qatysty
Otyrys jýyrda Kabýlda bolǵan teraktiden kóz jumǵandarǵa arnalǵan bir mınýt únsizdikpen bastaldy. Keńes músheleri jasalǵan shabýyldardy aıyptady jáne halyqaralyq qaýymdastyqty terrorıstik qaýip-qatermen kúreste kúsh biriktirýge shaqyrdy.
Óz sózinde BUU janyndaǵy Qazaqstan Respýblıkasynyń turaqty ókili Qaırat Omarov elimizdiń turaqty, qaýipsiz jánen gúldengen Aýǵanstan tujyrymdamasynan aınymaıtynyn basa aıtty. Ol Aýǵanstandaǵy jaǵdaıdy retteý barysynda aýǵandyqtardyń qatysýymen jáne jetekshiligimen saıası úderis ótkizý qajettigin jáne halyqaralyq qaýymdastyq pen aımaqtaǵy memleketterdi tartý kerektigin atap ótti.
Q.Omarovtyń aıtýynsha, Aýǵanstandaǵy jaǵdaı lańkestikter aktilerdiń joǵary qaýpine jáne esirtkiniń zańsyz óndirilip, taralýyna baılanysty áli de turaqsyz. Bul tutas Ortalyq Azııa aımaǵy úshin qaýipti. Sonymen birge, ol BUU Aýǵanstanǵa járdem berý jónindegi ókildiginiń jáne esirtki men qylmys jónindegi BUU basqarmasynyń jumysyna joǵary baǵa berdi.
Qaýipsizdik pen damý máseleleri arasyndaǵy tyǵyz baılanysqa basymdyq túsire otyryp, qazaqstandyq delegatsııa Prezıdent Nursultan Nazarbaevtyń Aýǵanstan járdem berý jáne aımaqtyq jáne jahandyq qaýipsizdikti nyǵaıtý jónindegi bastamalaryna Qaýipsizdik Keńesi músheleriniń nazaryn aýdardy.
Odan bólek, dıplomattar Almatyda Aýǵanstan men ózge de ortalyqazııalyq memleketterge gýmanıtarlyq jáne ekonomıkalyq kómek kórsetýdi uıymdastyra alatyn BUU aımaqtyq ortalyǵynyń halyqaralyq qurylymdar negizinde jasalǵan jobamen muqııat tanysýdy usyndy.
Aýǵanstanǵa qazaqstandyq kómektiń konteksinde kólemdi bilim berý baǵdarlamasy týraly da eske salyp ótken jón. Baǵdarlama aıasynda myńǵa jýyq aýǵandyq jastar Aýǵanstanda asa joǵary suranysqa ıe mamandyqtar boıynsha Qazaqstanda sapaly bilim alý múmkindigine ıe boldy.
Odan bólek, 2017 jyldyń aqpan aıynda Kabýlda Qazaqstan, Japonııa jáne BUU Damý baǵdarlamasynyń aýǵan áıelderiniń ekonomıkalyq derbestigin nyǵaıtýǵa jáne olardyń Qazaqstanda memlekettik basqarý, densaýlyq saqtaý boıynsha bilim alýyna baǵyttalǵan birlesken jobasy tanystyryldy.
Otyrys 2017 jyly 10 naýryzda ótti.